Chin Disciplinary Action Committee ( Cheras Alam jaya )

peams

2010-04-17T10:45:00.000-07:00

[Infinite Love] is a weapon of matchless potency.
It is the "summum bonum" of Life.
It is an attribute of the brave, in fact it is their all.
It does not come within the reach of the coward.
It is no wooden or lifeless dogma but a living and life-giving force.
It is the special attribute of the heart.

--Mahatma Gandhi

Cheras CDAC Authawng No.9

2010-01-23T08:14:00.000-08:00

Oparasi a tam lai ( ralrin kan hau)!!!!

Malaysia cozah nih bia an chahnak ah 2010 in cun ramdangmi phung loin rian a ttuanmi thianh dih ding ti a si. Zeitik in dah an thawk te lai ti cu fiang in an chim rih lo nain a ra lai mi February thla in cun biatak tein thawk ding in timhtuahnak an ngei.

Malaysia ram chungah phung-ning loin rianttuanmi hi an tamtuk hringhran. India miphun lawng hmanh 40000 hrawng an si tiah Najib nih a chim. A dang ram pawl Indonesia, Pakistan, Bangaladesh, Myanmar le Nepal pawl zong hi phung loin rian a ttuanmi an tam tiah a ti. Phung-ning lo i rian attuanmi cung ah ngeihthiamnak a um ti lai lo tiah Immigration bawizik nih thanhnak zong a tuah.

Thianhnak ah ttuanvo a la tu ding hna cu Rela le Police an i bawm lai ti a si. A bik in rianttuannak seh-zung ngan deuh le Restaurant ngan deuh pawl in thawk te dawh a si. A ruang cu an mah malay mi rian loin a fakvaimi an tam ca zong ah a rak si. Cu pin ah ngandamnak lei kam zongah phung loin a ummi rianttuan pawl nih zawtnak tamtuk an chuahpi ti zong ruahchih a si.

Malaysia ramah raifenh zawtnak hi a rak um lo tiah an rak ruahmi a si . Nain ramdang hlawhfa biatak tein an phak hnu in raifenh zawtnak zong a karh i, ramtthen 6 tiang a phan cang tiah Malay ngandamnak lei vuanci nih a rak chim bal.

Cucaah zei thil kan ton lai ding hi theih khawh a si lo. A fiangmi tu cu Oparasi luh a tam lai. Kan i chawhvah le leng kan chuah, rian kan ttuan tikah ralring deuh in um thiam ngai kan hau.
Nihin ni malay cozah ai timhnak ahcun Thonginn ah caan sau tuk chia ti loin mah le ram tu ah fel tein kuat khawhnak lam tu kha ai ruahchanmi a si. Rian a ttuanmi nih February thla chung cu kan i ralrin ngaingai a hau.

2010 in cun phung ning loin rianttuan pawl cu thianh dih ai timhnak kong Malay cozah nih thawngzamhnak kipah a thanh cang.

2010 Cheras CDAC hruaitu thimnak a um lai

A ra lai mi zarhpi ni 24.1.2010 ah 2010 CDAD hruaitu thimnak a um lai. Khuakhat ah aiawhtu minung 3 cio in chuah a si lai i mah ahcun lutlai thimnak zong a um chih lai. Kan sang chung him tein kan um khawhnak dingah a kan hruaitu an si bantukin mipi nih thazaang chuah cio hna usih.
CDAC rianttuan hi a ho ngaingai nih huam ngai in ttuanmi a si lo, miphun dawtnak he ttuanmi rian a si caah a ho kan si paoh miphun dawtnak a ngei bu tein le sangchung him tein kan um khawhnak ding a duhmi paoh nih tel khawh a si.

2010 CDAC pumpalulhchuihnak dingah ai telmi hna

1. Za Neih Thang 2. Thawng Bawi 3. Solo Sang Biak, 4. Chan Sang
5. Peng Thang 6. Khamh Peng Lian 7. Ram Nun Cung 8. Sang Bawi
9. Tha Bawi Lian 10. Za Bawi Hmung 11. Ram Bik 12. Sang Chin
13. Ce Lai 14. Bawi Cin Thawng 15. Za Bik 16.Ngun Hai
17. Biak Hram 18. Van Cin Mang 19. Sang Lin 20.Simon
21. Tum Bik Cung 22. Pu Khua Kil 23. Sang Hnin 24. Van Bawi Biak
25. Dar Uk 26. Van Sui Thawng 27. James Van Neih Lian hna hi an si.

Note: Min kan hrelh sualmi hna nan um a si ahcun Upa sinah thawngthanh tthan ding in kan in nawl hna. Mah min ai telmi hna nih kan i manh caan zinglei le zanlei ah Training tuah chungnak zong a um cang lai caah timhtuahnak ngei cio hna usih. Pumpalulh chuihnak lei a kan hruaitu ding Van Bawi Biak a si lai.

v Leng kan chuah tikah nu nih suitthi i tuah lo ah a ttha.
v Taxi kan hlan tikah India ( Kala) hrial ah a ttha.

I sikvuaknak a um ruang mi pahnih hma an pu

Hmunhelh khuami Cung Za Lian ( kum 23) nih Thau khuami Sang Cung Lian le Bawi Thang Lian cu hriam ( naam ) in a hliamh hna caah siikhan (Clinic) an phan. Nain an hma hi a fak tuk cu an si lo.

3.1.2010 zarhpini zan 9:30 hrawngah an i sikvuak hi a si. Bawi Thang Lian (Thau) hi a orhlei kut a tha zawnah nam in a zei pinah a khup zong a hliamh rih. Cun Sang Cung Lian (Thau) hi a ttangah hmunhnih le a hnulei liangah hmunkhat tiin hmun thum ah hriamhma a um.

Zan 10 p.m ah CDAC sinah thawng an thanh colh i an va chuah hnawh colh hna. Mah lio caan ah hma a pu mi hna i an hawikom, an chungkhat cingle cu an lung a fah ruangah lehrulh ding in mi tampi an rak chuak. Nain CDAC nih khua kan khan lai an ti caah an dai tthan. Ai si vuami hna cu inn pakhat ah CDAC nih tonternak le biahalnak an ngeih hna.

Hi sikvuaknak (buainak) ah ai tel ve mi hna cu Hmunhelh khuami Mang Thang Cung (Kum 26) le Thantlang khuami Ngun Neih Thang (Kum27) hi an si ve.

Hma a pu mi hna cu zeiruangah nan pahnih cun mipakhat nih hriam in an hliamh khawh ning hna tiah an hal hna tikah Bawi Thang chimnak ah “ka zam lai ka ti ko nain Ngun Neih Thang nih a ka tleih i zam kho lo in” mah ahcun hriam in a ka hliamhnak a si tiah a ti.

Hriam a hmang tu Cung Za Lian cu zeiruang ah dah nam nai ken? An ti tikah “ Tinriamnak he ai tlai mi nam fate khi a si, Malay cu damiah an tam tuk an ti i, pum ralvennak ah kai ken pengmi a si” tiah a ti. CDAC upa nih zeiruangah hriamnam na hman an ti tikah CZL nih cun an ka vuak i ka celh ti lo i , kai kenmi nam cu ka hmannak a si tiah a ti . Ai kenmi nam hi a chuahpi kho lo i zeibantuk nam a si kan thei kho lo. A mah le a hawi le nih cun tinriamnak he ai tlaimi nam fate khi a si ko tiah an ti. Nain an i sikvuak lio a hmu tu mipakhat nih cun a nam cu a tleumi a si i, a bil in bil khawhmi pawl a si tiah a chim. A nam cu a pum chung kan chek dih nain kan hmu ti lo.

Cheras CDAC nih hi buainak kong hi kan mah nih kan tlangtlak kho lai lo tiah an ruah i, hruaitu upa hna tonnak an ngeih hnu deilei 1:00 A.m ah Taxi pathum an hlan i, Cung Za Lian , Ngun Neih Thang le Mang Thang Cung hna cu Imbi CDAC zungah an kal pi hna. Thau khuami pahnih tu cu Taxi pakhat in CDAC upa nih Clinic ah an kal pi hna. Cung Za Lian , Mang Thang Cung le Ngun Neih Thang hna cu zinglei 2:00 am ah Imbi CDAC zungah an chiah hna.

Cheras Alam Jaya chung ummi laimi nih a voihnih nak hriam hmang in buaibainak kan ton a si. CDAC zulh ding phung Code (4) ah 'zuri nih hriam i ken lo ding'. Mi va hliamh lo zongah zurit buin hriamnam he leng chuah hrim lo ding. Code (4) a buarmi , CDAC nih a herh a ti ning in dantatnak pek ding ti a si. A luancia thla hnih hrawngah hriam hmang in mi a rak hliamtu kan unaupa zong CDAC dantatnak thlakhat thong le RM 500 dantat a rak si. A tu ah a voihnihnak kan vun ton nolh tthan tikah thling hna a za ko. Laimi le laimi hriam kan hman mi hi cu ngeihchia ngaingai cu a si ko.

4.1.2009 Chun 12:00 ah Cung Za Lian, Mang Thang Cung, Ngun Neih Thang hna cu biaceih an si. A tanglei bantuk in an mah pumpak sual ning cio in dantatnak pek an si.

1. Hmunhelh khuami : Cung Za Lian Code (1) le Code (5) a buar caah Dantatnak fungtuk voi (10), RM700 le ni (30) hren ding.

2. Hmunhelh khuami:Mang Thang Cung Code (1) a buar caah Dantatnak fungtuk voi ( 6 ) le RM.250 , zanthum thong

3. Thantlang khuami : Ngun Neih Thang Code (1) le Code ( 4 ) a buar caah Dantatnak : Fungtuk voi (10) le RM 250, zanthum thong

Hliamh a tongmi hna

4. Thau khuami : Bawi Thang Lian Code (1) a buar caah Dantatnak Fungtuk voi ( 6).

5. Thau khuami : Sang Cung Lian Code (1) a buar caah Dantatnak Fungtuk voi (6) tiin dantatnak pek an si..
______________________________________
OUH CHIN NGE

Thitumh puai, thlacamnak tibantuk ah Vedio thlak na duh ahcun hawinak man deng in thlak khawh a si.

Lai thil phunphun zong cawk khawh a si.

Pehtlaihnak: Dawtte ( Cheras Alam Jaya Bus stop pawng)
012-2894785, 017-6944924

CDAC Authawng No. 8

2010-01-02T07:58:00.000-08:00

Editorial,

Nitin kan nunnak ah sikhawh ti lo dingmi, sikhawh tthan dingmi timi pahnih a um.Biana-ah laimi si ka huam hrim ti loh US sicang ning ti law a si kho lo mi a rak si. Lai miphun na sinak cu zeitik hmanh ah a tlau kho lo. Sikhawh tthanmi tu cu sianginn kai lio mi mino kan si ahcun kan i zuam nak in catang sang si khawh a si. Kan pumrua , kan mui ai dawh lo ngaimi hna hi zeitluk i zuam len zongah dawh ngai le pumrua ttha ngai ah can khawh tthan a si ti lo. Kan lungput, kan ziaza ttha lo tu hi remh tthan khawh a si. Kum hlun chung kan nunning ruat in 2010 chungah zeidah remh ka herh, zei ah dah ka bau ti ruat buin 2010 hi kan zapi caah kum ttha si hram ko seh tiin.

Bia roling ( Mifim bia )

Thlacamnak hi chun ca ah tawhfung a si i, zan ca ah tawhhrenh a si. (G.herbert)
Conglawmhnak nih minung hi chiatnak in tthatnak ah a kan hruai. (Theihlo)
Phaisa cu millions zong in na ngei ko hnga nain na mithmai a tlan lo ahcun sifak tthiam na si ko.(Swami Disraeli)
Duhnak taktak a um lomi hngalhnak cu ceunak a um lomi meiinn bantuk a si.(Thomas Fudler)
Rumnak hi midang ca ah hman le cheuhbauh a si tikah thluachuah thaphnih a ngei.(OLD)
Lawmhnak taktak cu a pawngkam thil a cangmi in kan sinah a ra lo,kan chungin a ummi Khirh sin tuin a rami a si .
Thihnak hi nunnak i a thladem bantuk asi,thih than ti lo ding caah kan thi. (Herman Hooker)
Satan nih an thathut lio caan ah a zultu ah a kan ser,,Jesuh nih cun an rian he an i tuai lioah a thim hna.(Farrendo)
Ralchiami nih ngaknu dawh an co kho lo.(English proverb)
Tam deuh ngeihnak in tlawm deuh herh i tim. (Thomas)

Aa uahmi poah khi aa uah vemi nih an rem lo khun hna.(Rochefoucauld)
Na duhmi nak in, na herh mi kha a biapi ah chia deuh.( Unknown)

Lungput

By Biak Lian Thawng ( Thau )

2010 kumthar hna zong dam le lawm in a kan phanh tertu kan Pathian a min thangtthat si ko seh. Careltu nan dihlak cungah kumthar lomhnak um cio ko she tein nan kut kan tlaih hna. 2010 kum chung nifa kan nunnak ah kan tthut kan to, kan um kan kal nak , kan tlon kan lennak ah le kan phaknak hmun kipah kan ngeihawk le kan uarawk ahsiseh ti ka duhmi lungput hna cu ---

A lung a thiang i biading le biatak a ttanhmi lungput.
Uanthlarnak a ngei lomi lungput.
Ziar a ngei lomi lungput.
Pekmi, thenhmi sinak in petu, tthentu si ai zuam pengmi lungput.
Dinnak a ttanh i tthalonak a huami lungput.
Mi zawnruahnak a ngeimi lungput.
A lung a nem i toidornak a ngeimi lungput.
Mi deuhtu ka sisual lai tiah aa ralring peng mi lungput.
Keimah ruangah midang harnak phan hna lai kaw tiah ralring te le dawtnak he rianttuan aa zuammi lungput.
Ttuanvo pekmi upatnak in a tlam a tlinnak hnga caah aa zuam pengmi lungput.

v Mihrutmi hmur nih cun siknak a chuahpi, a kaa nih fungtuknak a sawm. ( Phungthlukbia 18:6 )

v Miphorhlaw mi hna caah fungfek cu chiahcia a si ko i mihrut hna keng caah tuknak cu timhcia a si ko.

v Zu hi nihsawhnak mi a phorhtu a si, ritnak zu hi I siknak a si, zu rit cu hruh a si. ( Phungthlukbia 20:1)

Zarh hnih chung CDAC nih dantatmi hna

# 9.12.2009 ni ah i sik vuaknak a rak chuahpi mi , Thau khuami Ram Tha Boi le Lal Sang Lian ( Thau ) hna cu CDAC phungning in 27.12.2009 ni ah (fungtuk)dantatnak voi 5 veve an inn hna hnuah biakamnak an tuah i, hi hnu ah buaibainak ka chuah pi hrim ti lai lo tiah an min an thut.

# 8.12.2009 ni ah i sik vuaknak a rak chuahpi tu Thau khuami Dawt Cung Bik ( Van Dawt ) cu 27-12-2009 ah CDAC phungning in fungtuk dantatnak voi 5 inn-ter a si. Hi hnu ah buaibainak chuah pi ti lo ding in biakamnak zong a ngei. Dantat ding tuanpi ah rak pek cang dingmi a si nain hmundang ah a zam caah X'mas lai a rak kai ah Dantat a si.

# 25.12.2009 X’mas zan 8:00 p.m hrawng ah Zephai khuami David Thang le Thawng Za Cung (Bawi Dawt Cung ) ( Zephai ) nih CDAC chungtel a si mi pakhat zei rel loin hriam put in an zuan hnawh caah David Thang cu a tlik i certual tiang CDAC Upa hna nih an va dawi nain an phan kho lo. Thawng Za Cung tu cu a tlik manh lo caah Upa hna nih an tleih manh. Bia tlawmpal an hal hnu ah a umnak inn ah an kal pi i, CDAC upa hna nih an kut zong an tlak pah i a cei ngaingai. Mah zan lila ahcun CDAC phungning in fungtuk voi 10 dantat a inn pinah RM 50 dantat chap a si . A UN card zong CDAC nih an lak piak i UNHCR ah tawlrel ding in kan ap lai an ti nain nawlnak a tuah caah 27. 12.2009 ni ah biakamnak min a thut hnu ah a UN card cu pek tthan a si.

December 24, 2009 Zan buaibainak a um ruangah Kawlpa lai pawl nih fak ngai in an hliamh

Zan timh 12 a.m hrawng ah lai tlangval cheukhat pawl nih zurit buin tlai hnu tiang an i chawh vah caah i sik vuaknak a chuak. A hmasa ahcun laimi le lai mi an i si vua i India pawl nih an chuah hnawh hna in an dai tthan. Khatlei kam i ai si mi pakhat Zephai khuami Sang Chin nih Kawl a hawi le a vai sawm hna i, lai pawl lehrul cham ding ahcun an kal. Mah an kal hi zinglei 3 a si cang. Lai pawl nih cun an vun zuan hnawh hna i , kawlpa pakhat cu a zam manh lo caah fak ngai in an hliam.

I sikvuaknak an chuahpi hi tlai tuk hnu a si caah CDAC nih a ho te dah kawlpa a hliamh tu an si ti fiang in an thei kho lo. Kawlpa cu a hma a fah pah caah caan rem a um ahcun lehrul than ding in timhtuahnak a ngeih kong a mah he ai neih niam sin in bia kan theih tik ah Cheras CDAC nih kawlpa cu kan va nawl. An vua tu hna cu kan chim law kan mah nih chimhhrinnak kan ngeih hna lai kan ti nain a ka vua tu hi a ho hmanh ka theih hna loh tiah a ti. Malaysia ram ah kawlmi kut in a luan cia kum 2 ah laimi nunnak a rak liam bal. Kawl te cu an ngamh tuk caah ttih an nung ngaingai caah lai tlangval din ei a hmangmi nih kan i ralrin deuh a hau.

X’mas zan ah Zephai khuami David Thang nih CDAC chungtel hriam in a zuan hnawh

“ Tu zan cu CDAC Upa pakhat khat nam in ka sawh hna lai i ka zam lai’’ tiah an khuami pakhat sinah a chim. Nam zung 4 sau ai ken i kawl dawr tangah a hawi le he cun an rak um. A hawi le nih cun an rak thloh len lio khi si dawh a si.

CDAC chungtel pakhat nih a va zoh hna tikah ningngal ngai kawl holh in Divid Thang nih cun, “ziah na ka zoh tiah a vun ti colh”. “Ziah! na ningngal ko e ka vun ti vial ah khin nangmah cu kan theihmi na si CDAC na si a vun ka ti colh”. Mah tlawm pal ah a hawi Zephai khuami Thawng Za Cung ( Kum 27) cu a hung phan i, “aho dah a ningngal ” a vun ti ah CDAC chungtel pakhat cu a ttang in a vun nam colh. David Thang nih cun nam cu a kut in ai hum i a vun zuan hnawh colh ve nain CDAC chungtel pakhat a rak um ve caah a hliamh manh lo. David thang cu a tli colh i, ram tang tiang CDAC upa nih an dawi nain an tlai kho lo. Zephai khuami David Thang hi 12.09.2009 lio ah CDAC Upa hriam put in zei rel loin a rak dironh bal cangmi a si.A mah hi ngakchia te a si nain a sual ngaimi , leng a chuah paoh ah hriam put a hmangmi a si.

Tleih kan zuam peng nain nihin ni tiang Cheras a umnak a rak hlam rih lo caah zeiti tuah awk a ttha rih lo. Hi bantuk in hriam i put in um a hmangmi a si caah CDAC rianttuan tu Upa hna caah ttih a nung ngaimi minung a si. Mipi aho kan si paoh ah hi bantuk um a hmangmi hna cungah kan i bawmh cio ahau. Cucaah cun mah mipa a hmu mi paoh nih nan hmuh le cangka CDAC sinah thawng nan kan thanh colh nak lai kan in nawl hna. Direct in tleih awk a tthat a si ahcun a ho paoh nih tleih khawh a si.

Malay ram chung CDAC rian ah pumpek in rian ai khinhmi hna nih ralrin deuh kan hau

Malaysia ram ah laimi nikhat hnu nikhat in kan hung karh. Nun dan ai dawh lomi zong tampi kan phan. Lai lei um ning in a ummi zong kan tlawm ti lo. Laimi hi miralchia hlah maw kan rak si tiah kan mah le kan mah tuah cun kan ral a rak tha ngaingai. Miphun dang hmai hna ah kan mah miphun cung kan raltthat bantuk in kan ral rak tha seh law cu a rak ttha tuk hnga nain. Miphun dang nih an kan ttih deuh hnga i, nihsawhnak tel in kan luat deuh hnga.

A biapi in kan i ralrin awk cu laimi a cheu khat hi zu an din pah ah hriam i put a hmangmi an tam ngaingai cang. Mi zei hmanh an ti ngam tung hna lo i, an mah a chim hrintu le an caah zalonnak a dawn tu CDAC rianttuannak hi an rem lo phun a si caah ralrin deuh kan hau.Laimi le laimi cu kan i ngamh tuk caah kan kal umnak kip ah ralrin deuh kan hau...

Thawngthanh

# Mobile registration cu January 5,2010, Salangor area in thawk tthan a si lai tiah UN nih thanhnak a tuah. Nain zei miphun dah an tuah hmasa hna lai ti tu cu a fiang rih lo. UN a lut rih lomi nih kan min peknak cioah lungsau tein rak hngak hna usih.

# TPF hruainak in Thantlang peng ihawikomhnak Pumpalulh chuihnak cu hlunghlai ngaiin IMBI certual ah ni hnih chung tuah a si. Cu hawikomhnak ah ai tel kho mi hna cu Thangtlang, Bual, Khuahring tlang, Hriphi, Vailam tlang le Vanzang tlang hna an si. A dongh nak (final) ah Bual le Khuahring an i tong i Bual nih an tei hna. Bual cu 2009 Thantlang peng pumpalulh chuih zuamnak ah 1^st an si.

# 2010 CDAC Cup cu a ra laimi Febuary thla ( Chinese New Year ) chungah hlunghlai ngaiin tuah dingin saduhthah a si. Pumpululh a chuih dingmi ca ah uniform zong tlamtling tein tuah a si cang. Pumpalulh chuih thiammi hna nih zaanghlei cawi in timhtuahnak rak ngei cio hna usih.

# Tu zanlei pum dih 4:30 pm hrawng ah CDAC Cup caah pumpalulh chuih dingmi thimnak a um lai i, tel a duhmi paoh nih tel khawh a si.

# Tu zanlei pumh dih in CSO sianginn i kan fa le sianginn a kaimi nu le pa meeting a um lai. Pello in nan rak chuahnak lai thawng kan in thanh hna.

# Cheras CDAC hruaitu thar thimnak cu January, 2010 thla chungah tuah dingin timhtuahnak a um. CDAC rian cu pumpekrian a si caah thinlung re a thei ngaimi a si. Nanmah le nan khua nan peng fellowship cio ah aiawhtu chuahpi dingin rak i thim chung ulaw a rauh hlanah thimnak cu tuah cawlh a si ko lai.

2010 CCF Cheras Mino hruaitu hna

Haotu : Za Cung Lian

Haotu chang : James Van Neih Lian

Chungttuan : Tum Bik Cung

Chungttuan bawmtu : Biak Tha Sui

Ngunkeng : Len Thluai Sung

A bawmtu : Chan Sang

Tangka cazin chekt :Tluang Za Iap, Biak Za Lian

Chungtel : Zam Hlei Thang, Solo Sang Biak,Thla Bor Cin:, Tu Chin Sung

Sunday School lei a kan hruaitu hna

Hotu : Siang Tin Tial

Hotu chang : Simon Zing Bik Thawng

Chungttuan : Paul Za Cung Lian

Cheras CDAC Authawng No.7

2009-12-23T00:30:00.000-08:00

Editorial,
Malaysia ram cu miphun ai cawhmi ram pakhat a si. Thumkomh Malaysia ti zong in an rak ti ttheo. India, Tuluk, le an mah Malay kokek tiin miphun phunthum in, a tam u cu an si. Tuluk miphun sing 13 hrawng, India miphun sing 4 hrawng, le an mah Malay kokek sing 17 hrawng an si ve. A dang dang Indonesia le Pakistanis pawl zong an um pah ve IC ngeimi . An ram milu sing 35 hrawng an si. State ( ramtthen ) 13 in an tthen i Siangpahrang a ngeimi ram an si. British kut in kawlram hlanah luatnak a rak hmu mi an si. An biaknak hna hi Islam biaknak le Buddish biaknak, Hindu biaknak, Khrihfa biaknak tiin an um. An mah Malay kokek hi Muslism an si caah an ram i ukning phung le phai ( Law ) hi Muslism phung le phai deuh in a kal.
An mah rammi sing 35 lakah phungning lo ( illegal ) in a ummi Sing 10 hrawng kan si.( Cozah thanhning ah). Mah sing 10 ahhin kan nih laimi hi thong 30 hrawng cu si dawh kan si. Phung loin kan um tik ah remawk cu kan rak har ngai (Cozah hmuhnak ahcun) . Malaysia ram cu 1972 kum UN ah a min a rak thut duh lo caah Refugees hi a pom lo an ram um ding ah . Nain an pom lo buin nihin nitiang cu khua kan sa kho hna. Nikhat khat ahcun biatakin phung loin a um mi hi a kan tthawl te ding cu a fiang. Democracy ram a si bantukin mipi duhnak ning in ai hruaimi ram an si caah ralzam a si mi hna nih an ram mipi hmaiah kan khuasak ning, kan um ning ai dawh ngaingai a hau. Kan mah duh ning in nun loin an mah ram sining he ai tlak in kan tthut dir a hau. Muslism cu zu an ding lo, pakhat le pakhat an i si vua lo. An mah um tein a ummi an si i mi nih hnahnawh pek an duh lo. Cucaahcun zohchia in din le ei, I sik vuak nak hi a um lo bak a hau. Kan thil hrukeih ah siseh , nitin kan nun ah siseh an mah ram sining in nun khawh i zuam kan herh.

Jingle Jingle khing riangmang ( X’mas biazai )

Van in awthawng a thang tthan
Van arfi an tthep
Mit-thlirh in an cuan vulei
An hngal kho lo an nih nih ( Johan 3:16 ).
Bethlehem iphorhlaw tuah
Vanmi nih sak khawh lomi
Thisensung thangtthat hla cu
Cawrawl kuang in sak si cang
Zoh hmanh! Sualnak akalpi tu tufa .

Salai Bawi Uk Thang

KRISMAS LUNGPUT

Biahmaithi :

Thawng kan theih tawnmi hi micheu caahcun thawngttha a si i micheu caahcun thawngchia a si. Bin Laden an thah ti hei si sehlaw US ram caahcun thawngttha a si hnga i Muslim kan unau hna caahcun thawngchia a si ko hnga. Than Shwe a thih zongah cu bantuk thiam-thiam cu a si ko hnga. Asinain Jesuh Krih kan ca i a chuahnak hi zei-ruangahdah Mi vial te caah a lianngan tukmi thawngttha cu a si khawh hnga? Tukum i kan tuah dingmi Krismas zong hi midang caah thawngttha a si khawh ve nak hnga zeidah kan tuah a herh ? Krismas kan tuahmi hi mikip caah thawngtha a si i Pathian cohlanmi a si khawhnak ding ahcun:

(1) Mah Siaremnak kaltak a herh
Vawleicungah zeithil paoh hi kanmah siaremning lawngte i kan tuah chung paohpaoh cu midang caah thilttha a si khawh lo caah, an caah thawngttha a si kho lo. Ralkap cozah nih an siarem ning te i an kan uk chung paoh cu mipi caah thilttha a si lai lo caah thawngttha a si kho lo. Jesuh chuahnak cu Mi vialte caah thawngttha a si nak cu
(a) Jesuh nih a van sunparnak vialte a kal tak, Amah siaremnak a kaltak.
(b) Tuukhaal hna nih an Tuu le an thilri an kal tak.
(c) Nichuahlei Mifim hna nih an nupi,an fale le ngeihchiah vialte an kaltak, .(Herod nihcun a thutdan a ven i, kaltak a duh lo caah Jesuh chuahnak cu a caah thawngttha a si kho lo)

(2) Kanmahnak i a niam deuhmi le sifak deuhmi zawn kan ruah a herh
Minung tampi cu KAWL NGIAN bantuk kan ngeih tawn caah rawl kan dangh hna zongah hmailei i a kan dang kho ve dingmi deuh kan dangh tawn hna. Cucu Krismas lungput a si lo. Mi dang sinin bawmhnak hmuh si loin midang bawmh duhnak thinlung kan ngeih a herh, cu lawng cu an caah thawngttha a si kho lai. Jesuh zong nih a van sunparnak vialte a kaltak i sualmuihnak vawlei ah a ra, bawmhnak, khamhnak a herhmi hna sinah a rat bantuk in Krismas caan ahhin bawmtu kawl lo in bawmh ding kan kawl a herh. .

(3) Jesuh he kan ton ter hna a herh
Krismas thawngtha cu Vawlei ah Jesuh a chuahmi hi a sin ko. Cu kan caah a chuakmi Jesuh cu kanmah nih kan hmuh le kan ton lawng si loin midang nih an hmuh ve le an ton ve nak hnga "Mah hihi Jesuh cu a si" tiah midang le Jesuh kan ton ter hna a herh. Ti le rawl din le ei lawng a za lo, laksawng pek lawng zong a za lo, Krismas ah a chuakmi Jesuh he hrimhrim kan ton ter hna a herh.

Biadonghnak
Kan tuah khel ning i Krimas tuah i , eiding zong tuah, laksawng zong i thlen, social tuah i nih le kheh zong a nuam tuk, a ttha tuk ko nain, Bawipa cohlanmi le Bawipa lungtong mi Krismas tuahnak a si khawhnak hnga a cunglei thil hna hi tlinh khawh i zuam cio dingin kan sawm hna. Krismas lawmhnak nan cungah um ko seh.
( Lai forum : Van T Lian ttialmi chungin )

Mifim bia
# Dawtnak apan tuk nak hmunah palhnak achah!(K.V Gda Rao)

# A ngeihmi lengin zeihmanh a duh ti lomi cu mirum a si.(luthries)

# Sikvelhnak si loin apalhnak ngaihchih ternak in a mitthli na tlakter khawh ahcun cu ngakchia cu chimhhrin aherh ti lo. AMan

# A thin ahung kho lomi cu mihrut a si.A thin a hun ter lomi cu mifim a si. (Old proverb)

# Rian tenau ngai va tuan ngam khi pasal an si.(Ben Johnson)

# Miralchia mi hna an teirulchamnak cu huatnak a si.(Geore Bernard Shaw)

# Nu nih ahmaisa cem ahcun va lawng an duh i,va an ngeih khawh hnu ahcun a phun/zai lei an duh.(Shakespear)

# Dinnak cu fimnak vialte lakah ahrambik asi I,mibu nunnak caah sengtu mirang vulei bantuk a si.(Dryden)

Zarhhnih chung CDAC nih dantatmi
5.12.2009 zan 11 pm hrawngah Ampang ummi Pa Tha Peng Lian ( Hakha ) le Raub ummi Pa Keih Lian Bawi ( Thau ) cu zalam kam ( Bus stop) pawngah an i vua i CDAC sinah thawng an thanh caah an va chuah hnawh colh hna. Mah zan lila ahcun CDAC phung ning in dantatnak le chimhhrinhnak an ngeih hna. An pahnih in hmun dangdang ummi an si. Hi bantuk in hmun dang in a rak ra ta mi nih ralrin deuh kan hau. Cun an tlunnak inn ngei tu zong nih CDAC nih a ngeihmi phung le phai zong kan chimh hna ah a ttha. Hmun dang a rak ra ta mi micheu nih cun CDAC a um le um lo zong an rak theih tawn lo i dantatnak kan vun pek tik hna ah an lung a tling lo ngai tawn.

Dantat rih lomi ( Ai si vuami hna )
9/12/2009 Zanlei 5 p.m hrawngah Kawldawr tangah i sik vuaknak an chuah pi nain CDAC sinah thawng an thanh lo caah an buaibai ning fiang in kan thei kho hna lo. Upa hna nih tonnak an ngeih hna nain a ho dah a sual a palh ti theih khawh an si lo. Pakhat nih a mah tthatnak lawngte ai chim.Pakhat kan hal tthan ah a mah tthatnak lawngte ai chim tthan ve. An kong a fian hnuah CDAC upa hna nih chimhhrinnak ngeih ding in timh tuahnak an ngei. Buaibainak a chuahpi mi hna cu a tanglei hna hi an si.Zephai khuami Ce Lai le Sang Chin ,Thau khuami Lal Sang Lian le Ram Bawi ,Lungding khuami Sui Lian Ceu, Thantlang peng Farrawn khuami Fim Chin Tu hna hi an si.

Oparasi a lut nain laimi kan him
14.12.09 nikhat ni zanlei 5 le 6 p.m kar hrawngah Immigration nih sehzung cheukhat ah mi an tleih hna. Lori pahnih khat in an tleihmi hna cu an si nain laimi cu kan i tel hraw lo. Indonesia le Bangla deuh an si. A thaizing zong ah Santtak lei ah Rela an lut tthan i tam ngai an tleih hna ti kan theih.
Malaysia cozah nih biatak tein Permit ngai loin rianttuanmi tleih dingin timhtuahnak an ngeihnak kong zong thawngla pawl sin ah Malaysia Home Minister zong nih a chim. Kan mah laimi hi UN minung kan si i rianttuan a ngah lomi kan si. Refugee Card in rianttuan hi malay cozah nih cun a duh lo ngaingai. Nain kan ttuan ne lo ahcun zeitindah khua cu kan sak ne hnga. Rian kan ttuannak hmun le hma kipah i ralrin deuh kan hau. I chawhvahnak hna ahcun UN card ngei mi cu an luat nain rianttuannak tuah cun luat a har ngaingai.

India ( Kala) misual nih UN card chuh kan tong
15.12.2009 zan 8 le cheu hrawngah Bus stop pawngah Thau khuami Tial Can le a fanu Biak Tha Chin, Ruakhua khuami Mang Cer cu Kala misualpa nih CID ka si tiah a ti hna i an Card a hal hna i ai kal pi. Lungre thei ngai in an um. Nain 17.12.2009 ni ah an CARD cu laimi pakhat sin in a rak pek tthan hna. Mah zan ah Laimi upa cheukhat nih an bawh len nain a rak chuak ti lo. Hibantukin misual thilchuh hmangmi hi kan ton hna lai lo tiah ahohmanh nih kan chim kho lo. Cucaahcun ralring deuh tein um i zuam hna usih. Rianttuan huam loin mi thil chuh in a paw ai cawmmi Malay ram ah hin an tam ngaingai caah Zan a muih hnu leng chuah zong hi kan i sum deuh a hau.

Thawngthanh
Kan rak thanh lengmang cangmi CDAC Pumpalulh chuihnak cu hruaitu upa khuakhan nak in tukum chung si loin hmai kum Tuluk Kumthar(February) ah si ding in an khiah tthan. A ruang cu Teams tamtuk kan si ruangah nikhat/ hnih ah kan I lim khawh lai lo caah holiday a tambik nikhua thim in timh tuah a si tthan. Teams 29 kan rak ti mi ahkhan teams fa deuh pawl cu an fonh hna I teams 18 hrawng si te dawh kan si.

Taxi kan hlan tikah a si khawh ahcun India ( Kala ) poah hi cu kan hrial hna ah an ttha. Mittha lo an tamtuk caah ralrin thiam deuh kan hau.

CDAC Authawng caah na siaherh capar, forhfialnak ca ttial khawh a si. Upa pakhat sin ah pek khawh a si.

CDAC pumpalulh chuihnak caah ngeihchiah a pe tthanmi Thau khuami Pa Kep Cung RM 5.
Tlangpi khuami Pa Van Tha Cung RM 5

Zu ri buaibai nan hmuh hna a si ahcun CDAC contact number ah thawngthanh colh ding a si lai.

Cheras CDAC Authawng No.6

2009-12-05T18:01:00.000-08:00

Editorial,
Dam le lawm tein le him tein a kan zohkhenh tu, kan biakmi kan Pathian thawngin 2009 December thla kan phak khawh caah Pathian kan thangtthat hringhran ko. December thla cu ramzakip Khrihfa lawng si loin Biaknak dangdang zong nih an sunsak bikmi thla a si. A ruang cu kan Bawipa Jesuh chuah thla a si caah a rak si.

Ramzakip ummi nih December thla chuah cun an mah le umnak khua, nu le pa chungkhat rualchan sinah an tlun caan zong a rak si. Khualtlawng lamlimi zong an tambik thla a si fawn. December thla phak le X’mas hmaan a duh tuk ko na buin vawlei harsatnak, thihlohnak ruangah a phan kho lomi mitampi an rak um ve. Nang le kei dam le lawm tein 2009 December thla a kan phak tertu kan Pathian thangtthat lo awk a ttha lo. 2009 chung kan nun lamhluan zeidah kan lawh ti tuak caan ni le thla zong a si. Nihin ni na sining theih na duh ahcun a luancia na nunning kha ruat law nai fiang ko lai. Na hmailei caan na sining ding theih chung na duh ahcun nihin ni na dirhmun i zoh law nai fiang ko lai. 2009 chung kan caan a liam cangmi ah zei thil ttha dah kan tuah khawh, asiloah a ra lai mi caan ah zei thil ttha dah kan tuah khawh lai ti kan ruah thla siseh law , December thla nih a chuahpi mi daihnak, remnak, hnangamnak le dawtnak cu mizakip cungah leng hram ko seh.

Phungthluk bia

* Ziaza ah dinfelnak a um ahcun nuncan ah dawhnak a um lai. Nuncan ah dawhnak a um ahcun innchungkhar ah tthurualnak a um lai. Innchungkhar ah tthurualnak a um ahcun ram chungah remnak a um lai.Ram chungah remnak a um ahcun vawleicung ah daihnak a um lai. ( Tuluk Phungthluk)

** Mirum pa cu nungak mit ah zeitik hmanhah ai dawh zungzal. ( French Phungthluk)

*** Saveh cu ramveihnak uico in kan tleih hna.Mihrut cu hlorhnak bia in kan tleih hna, Nungak cu sui le ngun chawva in kan tleih hna. ( German Phungthluk)

**** Nu pi vak bia he kir, vokpi vak thal he kir. ( Lai Phungthluk ).

***** Kawl tlawng bia le tipit bia. ( Lai Phungthluk )

***** Zurit buin chimmi bia hi biahmaan a si. Zu i zat pah ahcun thinlung chung ummi biathup ngai loin chim a si. ( Russia Phungthluk

CDAC rianttuannak

A luancia caan ah buaibainak lawngte nih Cheras sang cu a rak kan zulh (CDAC dirh tthannak in). Kan buaibainak ruangah zeihngallo nu/nau hna nih thinphang in rak um a si. CDAC upa nih biatak tein buaibainak um lo ding in rianttuan cu kan rak i thawk. Tutan CDAC hruaitu thar hna nih an i tleih bikmi tleihtleng cu mi pakhat khat cungah tleidannak ngeih lo ding le mi pakhat cungah kut thlak lo ding hi a si. Zulh ding phung le phai tu ttha tein kan suai i phung le phai ning tuin nihin nitiang kalpi peng a si. A cheu CDAC Upa cu mihuat kan tong. A cheu biafi kan ing. Nain kan himnak ding a si ko caah tiin biatak tein rian cu pehzulh peng kan i zuam.

Nai zarhthum chung kan umtuning kan zoh tikah kan dai ngaingai. A buaibaimi zong pakhat hmanh kan um hraw loh. Hi bantukin a ralaimi caan zongah buaibainak um lo tein kan um khawhnak hnga CDAC nih ai tinh pengmi a si.Kan hnu zarh hrawngah zoh dawh lo deuh in lam cungah a ri mi tu cu kan um pah tthiamtthiam hoi. Kan ngiat tik hna ah Cheras sang chung ummi si loin hmundang in a rak ra ta mi an tam deuh. Cucaahcun nan inn ah nan chungkhat pawl an in riah, an in len sual hna a si ahcun CDAC nih a ngeihmi zulhding phung le phai kha ttha tein rak rel piak hna uh tiah kan in sawm chih hna.

Ngandamnak theihtlei ( Tuah ah a ttha mi )

Coffee tam dinnak nih Hliahcang fah zawtnak a zor ter deuh ti a si.
Lakphak, mitsur, chocolate …tbk ai telmi pawl nih thil i cinken khawhnak a tha a tthawnter deuh ti a si.
Banhla (banana) ei khawh cu nu caah a tha khun. Nuphung theih lai zarhkhat ai duh ah zan ih laiah pumkhat ei piak khawh ahcun a ttha ti a si.
Nau pawimi hna caah cun Apple le ngasa ei khawh hi a ttha bik ko. Zawtnak phunphun zong a kham khawh. Hrial awk

Kuak zuknak nih pa pawl i an ci kha a hrawh khawh, Cuap caah zongah ttih nung ngai a si.
Nau a pawimi asiloah naulak ai timmi paoh nih cun zu he ai pehtlaimi paohpaoh cu a hrial awk a si.

Sweet December ah nuam ngai in

Mino hna hruainak in 1.12.09 zan cu Sing song service in caan hman a si. Zan 8:00 pm in pumhnak cu thawk a si i ai pum khomi zong kan tam taktak. Kl chung hlasak thiam lai mino tampi an sawm hna i a ropui khun.Pumh dih ah lucky-draw zong tlamtling tein an tuah i, mino caah cun a nuam hringhran ko. Ngeihchiah chawva in Sanpioh caah tiin mino upa chungin (Pa Tum Bik, Pa Biak Za lian, Pa Tluang Za Iap,Nu Thla Bor Cin) hna nih an hlut caah lunglomhnak a um khun. Hi bantuk ruahnak an ngeihmi hi i cawn cio hna usih. Mino an cawlcanghnak ah lunghmuih a um hringhran.A ra lai mi caan zongah mino rianttuannak hi mipi nih thazaang chuah chin hna u sih.

Kunyaa-haang chak i ralring hna u sih!

Kan nu le thlacam buu pawl nih zaanghlei cawi in Zing-zee block A,B,C,D lei. hleihlak hna cu zoh dawh loin kun-za haang chaknak lawngte an hmuh caah nihlawh tthul in a luancia thla chungah thianhhlimnak an ngei nain zarhkhat hnih a hung si ah a hlan ning tein Kunya-haang chaknak cu a um tthan tthiamtthiam ko.Kan kal um pah in kan siaremnak paoh ah kunya-haang chak lo ding in kan in nawl hna. Na chak kan in hmuh sual a si ahcun CDAC nih a herh a ti ning in dantatnak inter na si lai.

Zaanghlei cawi in thianhhlimhnak a kan tuah piaktu kan nu le thlacam buu an cungah lunglomhnak tampi kan ngei. Nitin kan khuasaknak ah Miphun dang hmai ah khua a sami kan si bantukin kan umnak pawngkam thianhhlimh khawh i zuam hram hna u sih.

Imbi le Pudu kal tikah i ralrin deuh ding

Laimi nih kan pal bik nak Imbi cu tleih le khih a um pah lengmang. A bik in Nirukni le Zarhpini ah a si deuh tawn. Chun lingcing pi zong ah mi tleih an hmang. A cheu cu an tleih khawh hna in phaisa 600 – 1000 kar in tlanh ter a si. Phaisa ngeih lo sual ahcun Thonginn ( Lock-up ) ah kalpi a si i, ni (14) chungah i tlanh khawh lo sual ahcun Thongpii ah kuat a si. Kan kal umnak kipah ralring tein kal um thiam i zuam hna u sih.

Nu pawl caah i ralrin ding!!!

Malaysia ram cu miphun kip cawh in a ummi ram an si bantukin mittha tampi an um nain mitthalo tampi an um ve. Malay ah rianttuan huam loin um i mi thilfir le mi phaisa chuh in nitin a vakmi an mah miphun zong tampi an um ve. Cucaahcun nu nih Suitthi kan pum cungah kan i tuah lo ah a ttha. Cun phaisa tamtuk he leng chuah zong hi kan i ralrin ahau. Harnak kan ton hlanah ralrin zia thiam kan herh …….

CSO kum dih Camipuai tluang tein an lim

Kum dih ah CSO sianginn ah fimnak hnuk a dingmi hna nih an ngeih tawnmi Camipuai cu tluang tein an lim cang. Sianginn zong khar colh a si i, 2010 January ni 5 in sianginn cu on tthan a si te lai tiah thawng kan theih.

2009 CDAC Cup

Tu thla chungah tuahtimhmi hmunkip CDAC i hawikomhnak cu kan naih chin lengmang ko cang. A bik in pumpalulh chuih ding a si lai caah pumpalulh chuih dingah ai timmi hna zaanghlei cawi ding in kan in sawm hna. Hmunkip CDAC a si lai caah Teams (29) hrawng si dawh kan si.Mah i hawikomhnak nih ai timh bikmi cu CDAC rianttuannak hi mipi nih zeitindah an theih fian khawh cem lai, asiloah mipi nih dirkamh a herhzia kha langhter ding ti a si.Kan humhimnak dingah le zalong deuh in khua kan sak khawhnak hnga zaanghlei cawi in ai pumpe mi hna nih tuah an timhmi ni le caan ah mipi nih thazaang chuah cio hna usih.Cheras CDAC zong teinak tlamtling hmu ding hrim in timhtuahnak kan ngei ko. Uniform zong tuah a si lai. Pumpalulh cinhnak ah tthihruai tu Upa Bawi Biak a si lai i, zinglei le zan leiah cinh chungnak ngai cio hna u sih.

Mobile register thawng

Mobile register cu din loin an tuah cuahmah lio a si tiah thawng kan theih. Thaizing thla 5 hi Penang a donghnak register an tuah hna a si lai. December ni 13 in 15 kar hi Ipoh ummi an tuah hna lai. UN a lut rih lo mi nih lungsau tein kan min peknak cio ah rak hngak hna usih.

CDAC upa mino zan pumh ah caan an hmang

22.11.2009 Zarhpi zan mino pumhnak ah CDAC upa hna cu caan thiah kan si i tlamtling tein kan hmang kho hna. Hi bantukin mino hna nih caan ttha caan sunglawi a kan thiahmi cungah kan i lawm hringhran.

Thawngthanh

CDAC Authawng ah na ruahnak, mipi sinah forhfial na duhmi cattial na duh ahcun Upa pakhat khat sinah pek khawh a si.
Malaysia CDAC hruaitu thar i thimnak cu tuthla ni 26 December ah Imbi CDAC zungah tuah dingin timhtuahnak aum ti thawng kan theih.
Zu ri buaibai nan hmuh hna asiahcun CDAC contact number pawlah thawngthanh colh ding a si lai.

Pumh lio ah ngakchia he ai pummi nih kan fa le ttha deuh in zohkhenh khawh zuam hna usih. Biakinn kan lut bak in kan Handphone off philh ti hlah usih

CDAC Authawng Tawlreltu : Salai Biak Hmun Lian ( 017- 2569409 )

Chersas CDAC Authawng No.5

2009-11-06T18:04:00.000-08:00

Editorial,
A dong kho bal lo mi thaizing,
tlaih khawh a si lomi caan
chungah khua a sa mi minung kan nunnak ,
hrial khawh a si lomi thihnak .
Minung kan nun caan hi a rak tawi tuk hringhran nain kan nun a tawi hi ruah awk ah kan rak ruah lo mi pakhat cu a rak si ve . A dong kho lo mi thaizing nih a kan fianhmi cu nikhat hnu nikhat thihnak lam lei ah kan kal ti hi a si ko. Thihnak cu aho hmanh nih hrial khawhmi a si lo caah nikhat khat cu aho poah thlanmual a liam ding lawng te kan si. Nunnak kan ti mi cu sullam ngei lo a si tiah mifim nih an rak ti awn mi, Sullam a ngei lo mi kan nunnak hi zeitin dah kan liam ter tawn ve. Vawlei ah hin ahmun mi zei hmanh a um lo. Kan nun caan tawi te chung ah hin dawtnak lawng leng ko seh.Mi cung ah tthatnak a tuah kho tu kan si lo hmanh ah chiatnak lei a tuah tu cu si hram hlah u sih.

Mifim bia
1.Lungrualnak nih a kan dirter, i tthencheunak nih a kan tlukter. ( John Dickinson )

2.Pakhat le pakhat i doh awk a si lo, lungkhat tein thil ttha lo tu kha doh awk a si. ( Thomas Carlyle )

3.Tlam a tlingmi lungrualnak nih zei thil poah a tuah khawh.

(Elienne Pivert de Senancour )

Zarhhnih chung Cheras CDAC nih dantatmi

3.11.2009 zan 10 hrawngah Thau khuami Biak Lian Thang le a nau Tha Bawi Lian cu bia an i elnak in i sik vauknak an chuahpi caah CDAC sinah report an tuah i an va chuah hnawh hna. A nau Tha Bawi Lian nih thlalang a thawngh caah a kut fak ngai in ai hliam pin ah a cal zong a tlek chih. A hma cu zoh sawh awk a tthat lo caah zan 12 ah Leisure mall clinic ah CDAC upa nih an kal pi.CDAC phung ning in dantatnak le chimhhrinnak an ngeih hna.Biak Lian Thawng hi a voihnihnak buaibainak a chuahpi cang mi a si cang caah a voithumnak a buaibai tthan sual a si ahcun a UN Card he a mah mipum he Imbi CDAC zung ah ap ding. An mah nih a herh ning in an tawl rel cang lai.

7.11.2009 zan 11:30 pum hrawng Zing-zee ah Thau khuami Za Hlei Thang le Mang Kung cu I sik vuaknak an chuah pi caah CDAC nih an va chuah hnawh hna. Zan ttim ah puaibai in an um ruangah CDAC phung ning tein dantatnak le chimhhrinnak an ngeih hna.

8.11.2009 zanlei 6:30 pm ah Thau khuami Dawt Cung Bik ( Van Dawt )le Kap Hmung cu kawl dawr pawng ah I sik vuaknak an chuahpi I CDAC sin ah report aum nain CDAC upa an va phak ahcun an rak um ti lo. Nain sang chung ah buaibai in an um caah CDAC phung ning in dantatnak le chimh hrinnak ngeih ding in timh tuahnak ngeih an si.

Ramthumnak lei ah
Pumpek in kum zei maw zat chung Cheras CDAC a kan dirhkamh tu Cheras CDAC chungtel Upa Hniar Hmun ( Cheras CCF khrihfa upa) le a chungkhar cu 11.112009 ni ah US lei ah a kan zuan tak cang.An lam thluan ah Pathian nih tluang tein umpi hram ko hna seh.

CHERAS sangchung um mipi sin ah tlawmhalnak
A ra lai mi December thla chung ah tuah timhmi CDAC pumpalulh chuihnak cu hlunghlai ngai in Imbi ah tuah ding in hruaitu upa hna nih timh tuahnak an ngei.Nihnih chung a si lai caah kan mah cheras sang chung in ai tel kho ding kal umnak le a herhmi dangdang ah Fund zei maw zat a herh.Mah Fund kawlnak ding ahcun Upa khua an khang i an i harh ngai.Nain mipi pei an um ko cu tiah biachahnak an ngei.An biachanhnak cu Cheras sang chungum laimi a si mi poah nih chungkhar chungkhat ah RM 10 cio in siseh tiin biakhiahnak an ngei. Nan in cio ah an rak in len tik hna ah tlamtling tein nan rak pek hna lai zangfah kan in nawl hna.
CDAC rianttuannak cu Malaysia ram chung hmun kip ah a buu in buu 29 hrawng kan si. Chin miphun kan tling dih lai mah I hawikomhnak ahhin.Teams (29) cu nikhat ah a si khawh lai lo caah nihnih chung tuah dingin timh tuah nak a um. Mipi thazaang chuah cio hna usih..

Lunglomhnak
Aibur khuami Pu Than Khar nih Chersas CDAC I hruainak ah RM 50 a kan hlut I a cung ah lomhnak tampi kan ngei. A dang dang zong nih CDAC rianttuannak hi nan dirkamh cio nak lai kan in sawm hna.

CDAC Cu pawngkam miphun dang zong nih dirpi mi buu a si
CDAC rianttuanak cu Chin miphun kan caah a herh hrim ko tiah UNHCR nih an ruah caah , Chin miphun umnak kipah UN nih mah buu dirh ding in a luan cia kum hnih hrawng ah forhfial a si. Pawngkam miphun dang hmai ah mit kem in kan umnak hnga lo le him tein le, zalong deuh kan um khawhnak hnga dirh mi buu a si.Mah le umnak sang cio ah phung le phai i suai cio a si i, kan riantuannak cio hi UN nih a kan dir pi cio.
Sang chung um malay upa hna le Rela hna he zong ton bia ruahnak kan ngei tawn i kan phung le kan phai zong kan rel ter tawn hna. An mah ram mi zong nih kan rianttuan nak hi an kan dir pi ve.

Dantatnak ah phaisa RM 50 a liam mi le a liam rih lo mi
Dantatnak lei ah UN nih cun minung pakhat ah fung 10 tluk lo ding in an kan forh fial. A tam bik fung 10 tuk a si , mah bin ahcun phaisa zong in dantat an si tthiamtthiam.
A tanglei ah phaisa lei in dantatmi a pe mi le pe lo mi
Tlangpi khuami Uk Cang (RM 50 a liam cang )
A pe rih lo mi
Thau khuami Van Nun Tha
Sopum khuami Tein Aung Myint
Lungding khuami Van Lin Thang

CHIN NATIONAL ARMY (Vice chief of staff) Colonel Solomon biahalmi lehnak

Biahalnak : Na chuahkeh khua le na innchungkhar na kan chim kho hnga maw?

Solomon - Ka pa cu Captian Mang Hei(Tleicia) a si, Ka nu cu Ngun Fom a si, Hriphi chuak kan si. Hakha ah kan um. Unau pa(6) chuak nu(3) le pa (3) chuak kan si. Atu hi fapa Tluang Za Thang le fanu Nomi Lai Par Dawh tiin fa(2) ka neih hna. Kan nu min cu Mih Cho (Mara phun) a si.

Biahalnak : CNF/A hi zeitik kum in dah na rak luh i,zei lungput he dah na rak luh?

Solomon - CNF/A hi 1988 kum in ka rak lut, ralkap uknak duh lo ruangah doh ding in ka rak lut i, kan miphun mah tein uknak hmuh kawh ding tiin dohthlennak tuah dingin ka rak lutmi a si.

Biahalnak : CNF/A ai dannak? Nang zeilei kam dah na tlaihmi rian a si?

Solomon - CNF (Chin National Fornt) cu party a si i CNA(Chin National Army) ralkap a si. CNF nih a ngaihmi policy kha CNA nih hin tlinh dingin a ttuan piak tu a si. CNA cu ralkap lei training kai a hau. CNF cu ralkap lei training kai hau loin ka miphun le ka ram caah ka thiamnak le ka ngeihchiah le ka thazaang dihlak in ka ttuan lai a ti mi poh nih cun party lut nak form phih in luh/ttuan khawh a si.CNF in CEC(Center Executive Committee) pa (9) lak ah member (1) ka si i CNA ah Colonel rank in ka um i VCS (Vice chief of staff) ka tlaih lio a si.

Biahalnak : CNA na rak luh nak in nihin tiang i na phlih khawh lo mi harnak le na phlih khawh lo mi nuamhnak?
Solomon - Harnak cu a tampi ko nain ka philh khawh lo mi pa(2) tein ka rak chim lai.

1. 1991kum ah Nagah ram ah kan hawi le he ni(45) chung rawl loin kan um kha cu philh awkah a har bak ko ka ti, kan ngaknu zong kan nu/pa kan hawikom, kan thliri a zeihmanh khi kan ruat kho lo, kan mitthlam ah buh longte kan ruah i kan zaanmang hna ah buh longte kan hmu.

(2) nak ah 2004-5 chung camp victory India le kawl pawl joint operation an kan kah ah a si. Camp victory hi kan khua bantuk tein kan ruah mi a si, biak inn le lentecelh nak phuntling le sattil arva, hangthei hangbo phuntling he kan khuasak nak a si. Camp chung in nufa ngakchia rual le zuat mi saram pawl kan camp chung in an kan chuah tak lio kha cu lung a fak i mitthlil he kan i then hna kha cu mitthlam ah a chaung peng i phlih har ka ti.Cun nuamhnak lawmhnak lei ti ah hin cun 1999 Chin (lai) mi kuam ah 1000hrawng a taang i US ram kulhchung ah an luh khawh le 2001-2 kum hrawng i Malay ah Thantlang in nu Sui Tlem, Hakha in nu Dawt Thluai hna thawk in Malay ah refugee an hmuh khawh hi a si. Aruang cu hi lio caan ah khan Malaysia hna i refugee sawkter cu thih nak lam kal fial tluk ah ruah a si. An duh lo an rak ttih tuk.Kha lio refugee caah a tuan mi Pu Khen Sang le a dang tuanpi hawi hna sinah lawmhnak tampi ka nei fawn.

Biahalnak : CNF/A hi mi cheuhkhat nih Hakha/ Thantlang le Matu lawng pei an si cu tiah an ti mi kan theihpah tawn,nang zeitin na ruah?

Solomon - CNF/A hi Hakha, Thantlang le Matu long kan si hrimhrim lo ti hi rak kan theih piak ulaw ka duh, atu ah cun Hakha, Thantlang le Matu lei tu hi a tlawm lei ah kan cang, Chin ai timi groups ah cun CNF/A ah hin Chin miphun cu kan tling bik ko lai . Cun nan rak thei awk ka duh mi cu CNF/A rian hi zaanghlei cawi rian a si tik ah i fial le I hnek khawh mi rian a si lo, ai pumpe kho mi nih tuan a si ko. Rian har bak cu a si ko.

Biahalnak : Malaysia na phanh ka i Malay laimi na kan hmuh ning? Cun CDAC hi zeitin dah nan rak dirh ning?

Solomon - Malaysia ka phak ka ah Malaysia i um mi Chin(lai)mi cung ah cun kaa lawm ngai, kha tluk harsat nak le tleihkhih thinphan launak lak ah rian an tuan i an peng/tlang an khua an sang Malaysia um mi Bu chung ah khan an i bawm chang hna pinah kan ramchung khrifa bu peng le tlang nu le pa hna sinah a si khawh tawk in an kan bawmh an kan zoh khenh hna nak cung ah kaa lawm i ka upat fawn hna. Amahbelte miruaramlo zeimawzat a um mi nih khin kan Chin miphun (lai) mi pawl ningzah mualpho in an kan chiah mi hi cu a poi ka ti tak. kanmah le kanmah khuakhat le khuakhat kan ni sik kan ni vuak kha cu kan ning a zak tuk. Kanmah le kanmah ah cun kan ral a tha tuk i miphun dang he cun kan ral a chiat tuk ka hmuh tik ah ka lung nuam lo ngai. Chin(lai) miphun nih kan ral hi kan theih lo i kan i fiang hauha lo mi ka hmuh tik ah ka ngeih zong a chia ngai. Cun CDAC hi kan mah nih kan dirh mi a si lo, an mah Malaysia um mi kan Chin miphun Pastor, khrifa upa, peng/tlang upa, mino upa, NGO upa vialte nih an mah hnatlak tein dirh mi a si, kan nih cu a bawmtu kan si.An ni hruai nak le an riantuan khawh nak cungah lawmh nak tampi ka nei i an hnu in bawmh ding in kan ni ready peng. An riantuan mi hi i pek nak rian a si i upat awktlak ngai a si. Chin miphun khuazaa um mi poh nih i cawn awktlak a si tiah ka hmuh.

Biahalnak :Tulio ramchung ah rian an tuan mipi he ti kan theih pah, zei bantuk rian dah mipi he an tuan tti mi? Kan hlawh a tling pah tiah nan i ruat maw?

Solomon - A si. Tulio ramchung ah Malaysia i CDAC bantuk khan khua peng/tlang mipi that nak caah tiin mino pawl rian an tuan hna, an tuan nak zong duh a nung ngai i an hnu lei in bawmh ding zong ready in kan si peng. Mino pawl an riantuan nak hi kan Chin ramchung pengkip tlangkip ah a si cang i an hlawh a tling ngai tiah kan ruah i kan lawmhpi tuk hna. Ramleng um mi Chin miphun vialte nih nanmah le peng/tlang mino Bu riantuan nak cio ah rak bawm hna u ti hi cah kan duh fawn hna.

Biahalnak : 2010 election Kawl cozah nih tuah an i timhmi cungah na hmuh ning?Nan mah ralkap lei nih teh ramchung cawlcangh nan i tim maw?

Solomon - 2010 election kawl cozah nih an ni timh mi hi cu a tu ning tein an mah duh ning in an kalpi ah cun kanmah zong vawlei pumpi zong nih kan pawmpi hna lai lo ti cu a fiang ko. Atu tiang ah hin zei election dun le dan zong a chuah rih lo caah hin chimawk zong a har ngai ko. Annih hi cu an chim ning in a tuah bal lo mi an si caah zumh an um kho hrim lo. Kan duh mi chuah khawh nak ding ah mipi he rian kan tuan tti peng ko i kan tuah mi a details cu chim ding ah a si kho deuh rih lo.

Biahalnak : Malaysia mipi sin ah bia sia herh cah na duh mi tlawmpal…

Solomon - Malaysia um Chin (lai) mi nih kei cu ka kal lai i a tang mi tham hi cu a duh poh in um seh, rawk seh timi sal lungput nei loin zeithlil tha dah ka tuah/chiah tak lai timi lungput nei hna usih ti ka duh. Isreal bantuk in ram le miphun dawt, phunttanh, mahbiak nak ttanh, holh(caa) le phunglam pakhat hmah thlau loin um, cun phak nak poh ah miphun dang kha tthat nak lei in an tei fawn hna bantuk in i chim awktlak Chin miphun kan si ve ko ti hi i theipeng hna usih tiah cah kan duh hna.

CDAC (cheras): Na rian tampi lak ah kan biahalnak na kan leh i kan i lawm.

Solomon - Hi bantuk ka ruah ning le ka hmuh ning chim nak caan tha le caan rem nan ka pek caah kaa lawm tuk ve.

Cheras CDAC Authawng (No.4) 1 November 2009

2009-10-30T09:38:00.000-07:00

Editorial,

Kan miphun a kan niam ter tu le miphun dang nih zei i a kan rel lo nak bik cu buaibai kan hmanmi le zu rit zohchia in um kan hman ruang ah a rak si.Kan ram,kan vawlei zong a si lomi ah kan tthutdir,khua kan sak tik ah kan umnak ram umtuning,tthutdirning hawih in nun khawh kan hau ve.Malaysia ram cu Muslims ram a si caah kan i ralrin ngai cu a hau.A buaimi pakhat/hnih ruangah report kan tong tawn,ngakchia nu/nau zei thei lo tiang thonginn an phak tawnmi ruah ah lung a fak hringhran.

A cung ka langhter cang bang thongtlaknak chung in siseh,miphun dang nih niamtuk in a kan hmuhnak in kan luat deuh khawhnak hnga tiah Laimi kan pa le CNF/CNA chungtel Pu Khua Uk Lian,Pu Solomon,Pu That Ni hna hruainak in CDAC cu pengtlang upa ai awh tu hna he rak dirh a si.CDAC rian cu pumpek rian a si bantuk in a ho poah nih ttuanvo kan ngei cio.Kan liang cung ah khinh cio kan si.Kan himnak ding le zalong deuh in kan tthutdir khawhnak hnga ding ah dirhmi buu a si caah zei rel loin kan umnak hnga lo kan sawm hna.

Miphun tthanchonak le ttumchuknak hi holh le ca ah a um

Vawlei cung ah caku(paper)a rak ser hmasa cem hi Tuluk mi Sainglun(SANLUN) timi pa a si.AD 104 ah a rak ser khawh hi a si. Caku(paper) a rak ser khawh bak in a sermi catlap in an ram Siangpahrangpa cu a va biak colh. Siangpahrangpa nih a thil sermi a duh tuk caah an ram uktu bawi pakhat ah a canter.Caku serthiamnak (fimnak) cu nikhat hnu nikhat in Tuluk ram ah a hung karh.Caan zei maw zat a rauh ah SAN’LUN cu thil sual a tuah mi a um caah a ning a zak tuk i Poison sii a rak ding i a mah tein ai that.A mipum cu thi hmanhseh-law a fimthiamnak cu a rak nung.

Tuluk ram cu caku(paper)tampi an chuah khawh pin ah an holh an ca te in mipi rel ding ca hna an hung chuah khawh cang.Hi lio chan ahhin Nitlak ram pawl nih caku(paper)an hmang kho rih lo.Caku(paper) biatak tein an hung chuah hnu in Nitlak ram lei nak in a let in Tuluk miphun cu an hung tthangcho. An sermi Caku(catlap) hna cu ramdang ah an zuar hna( Nitlak ram lei ah).Mah fimthiamnak cu Nitlak ram pawl nih thiam an duh tuk nain fawi te ah an thiam kho lo. A thli in Tuluk ram ah Nitlak lei ram cheukhat pawl cu Arab ram lei in an rak lut i zanttim ah Caku an sernak sehzung ah caku serthiam pawl cu an rak luh hnawh hna.An tleih hna i an ram ah an tlunpi hna.Mah hnu cun Nitlak ram pawl nih Caku(Paper) cu a hung ser khawh ve.Mah chan lio ahhin Tuluk ram le Nitlak lei ram an tthancho ning ai dang ngaingai.Tuluk nih a let in Nitlak lei ram cu a rak tei.

Nitlak ram lei nih caku ser an hun thiam tlawmpal ah Canamnak(Type Writer) cu England pa David ti mi pa nih a vun ser khawh colh.Canamnak(Type writer) an hun ngeih le cangka in ca tampi an hung chuah khawh ve.Tuluk nak a let in mipi rel ding siseh,a dangdang pawl an mah holh ca te in an hun chuah khawh ve cang.Tuluk cu an ca chuah a tlawm i Nitlak lei ram nih a hung phak duahmah tthan.Tuluk nih Type Writer an ngeih lo caah an ca chuah a tlawm caah asi.Mah ti cun Nitlak ram nih a hun phak ziahmah tthan.Tuluk le Nitlak lei ram an rak tthacho ning le an rak ttumchuk ning zoh ah “Miphun tthanchonak le ttumchuknak hi holh le ca ah a um ti a lang.

SAING’LUN nih caku a rak ser hlan ah Tuluk nih rua le Nitlak lei ram nih Papyrus thinghnah an rak hman.A cheu nih lung le thing hna an rak hman.Kan nih laimi zong a luancia kum 120 hrawng ah Saphaw kan rak hman ve…

Lai miphun kan tthachonak ding ah kan holh kan ca kan dirhkamh a hau.Ca tampi in kan chuah a hau,a rel lei zong ah thazaang kan chuah a hau. (salaipahmun Ch:Lai Cazual,Kalay 2006)

Zarhhninh Chung CDAC Rianttuannak

1.Lungding khuami Van Lin Thang cu(13.10.2009) ni buaibainak a rak chuahpi mi ruangah CDAC phungning in (18.10.2009)ni ah dantatnak le chimhhrinnak an ngeih cang.A mah zong 21.10.2009 ni ah US lei ah a zuang cang.Fung voi 10 le RM50 liamter asi.

2.Tlangpi khuami Van Bawi Cuan cu Lungding khuami Van Lin Thang hriam in a rak hliamh caah Cheras CDAC nih 28.9.2009 ah Imbi CDAC zung ah kal pi a rak si..30.9.2009 ni ah CDAC nih a kong ceihnak kan ngeih.Fung voi 10,thlakhat thong le phaisa RM500 liamter ding in bia kan rak khiah.19.10.2009 ni ah Tlangpi khua upa hna nih CDAC sin ah nawlnak an tuah caah Van Bawi Cuan kong cu ceih tthan a si. Fung voi 10,Thong ni 22 Phaisa RM 400 liamder ding in biachahnak ngeih a si tthan..19.10.2009 ni ah CDAC phungning in dantatnak le chimhhrinnak an ngeih hnu ah CDAC nih na sual ti lo ti in thonginn in an chuah cang. Van Bawi Cuan cung ah sualphawtnak a um ti lo,hmailei ah sualpalhnak a tuah tthan i CDAC zung a phak tthan sual ahcun a thar in a sual thingmi he zoh piak in a kong ceih tthan asi lai …

Hnifenh buin leng a chuakmi

1.11.10.2009 ni ah Thantlang khuami Ngun Hnem

2.18.10.2009 ni ah Dauchim khuami Zing Hlei Tial

Hnifenh buin leng kan chuah tawnmi hi pawngkam miphun dang hmaiah zohrem deuh lo a si caah biatak tein kan i ralrin a hau.UN zong nih an rak chim lengmang cangmi a si.Miphun dang sin ah khua a sa mi kan si bantuk in an mah ram he ai tlak deuhmi thilthuam i hrukeih thiam kan hau.

2010 CDAC Cup

A ra lai mi December thla chung ah CDAC hruainak in i hawikomhnak pumpalulh chuihnak cu hlunghlai ngai in tuah an i tim.Nihnih chung a si lai i mah le sangchung cio minung poah tel khawh a si lai.CDAC lawng si loin ahopoah i tel khawh kan si.A hmun cu Imbi Certual ah a si lai.Kan mah Cheras zong zuamnak ah teinak kan hmuh khawhnak hnga zaanghlei chuah kan hau.A ni cu Decemer 18/19 si dawh asi..Kan mah le kan ti khawh ning cio in kan i manh caan ah Training kan tuah pah a hau cang lai .Pumpalulh chuih a thiam deuh mi poah nih CDAC sin ah min pek a si lai.

Ramthumnak lei ah

Pumpek in a thazang he a ngeihchiah chawva he Cheras CDAC a kan dirhkamh tu Cheras CDAC chungtel Van Hmung Uk le an nu cu 26.10.2009 ni ah US lei ah a kan zuan tak cang.An lam thluan ah Pathian nih tluang tein umpi hram ko hna seh.

Philh lo ding

v Pudu,Imbi,Kotaraya hrawng ah nai hrawng cu Uniform hruk loin mi tleihnak a tam ngai caah rianherh kan ngeih tuk lem lo ahcun hrial khawh i zuam hna usih.Nai hrawng mi an tleih dan hi thong ngaingai thlak loin Phaisa RM600 in RM1000 kar in tlanh ter a si.

v UN Card ai tleihmi nih kan Card kan tlau nak hnga lo ralring tein kenkawi kan hau.Na card na thlau sual a si ahcun Card pek tthan a si ti lai lo,catlap lawng pek asi cang .

v UN Card ai tleihmi dam loin siizung na phak sual a si ahcun UN zung ah thawngthanh colh ding asi lai.Chawkit siizung tu cu UN ah thawngthanh ahau lo.Card na piah hna in Direct in na dihmi a cheu cu an in zuh piak colh lai.

Nu le Pa kan rian:

Kan fa le sianginn an lawi hnu ah zeidah an tuah ti hi nu le pa hna nih ttha tein kan zohkhenh hna an hau.A cheu kan fa le cu midum theihai hna nawl ngei loin va lawh an hmang.Leng ah kan chuak ter tuk hna.Ram lak ah rap hna chiah an hmang i ttha deuh in zeidah an tuah ti kan ngiat hna a hau.Khuasual hna an purhnak hnga lo nu le pa kan rian asi.

Tlawmhalmi cung ah lunglomhnak

Cheras CDAC cu caan zeimawzat a vun i din,dinhthai awk a tthat lo caah dirh tthan a si.Hruaitu thar pawl nih mipi sin ah hnorsawn rih loin Fellowship tu ah tlawm kan hal lai tiah bia an khiah.An khiah bantuk in a tanglei ning in CDAC caah an ngeihchiah chawva an pek bawmh caah Cheras CDAC nih kan lunglomhnak kan langhter.

Thau Felloship RM 150

Hakha Felloship RM 100

Zephai Felloship RM 100

Tlangpi Felloship RM 100

Rian loin a ummi caah min pek khawh asi rih

Kan hnu kan thanh cang bantuk in rianttuan a duh mi hna caah min pek khawh asi rih.Electronic sehzung ah asi lai i nikhat ah RM30 a si lai.Malaysia ah zeitik tiang kan um lai a hohmanh theih a si lo bang,a hmun mi rian kawl kan hau.Rian ttuan a duh mi hna caah pehtleih khawh asi.

Ngun Ceu (0173815982) ah fiang deuh in hlat khawh asi.

Theihternak

v Zu ri buaibaimi nan hmuh hna ahcun CDAC sin ah thawngthanh colh ding.

v CDAC Authawng ah na siaherh capar tial na duh ahcun ttialkhawh a si. Zarhhnih ah voikhat voikhat,tlap 80 in chuah a si..

Web side: www.batu9cdac.blogspot.com

“Discipline is human value”

2009-10-27T05:34:00.000-07:00

2009-2010 CHIN DISCIPLINARY ACTION COMMITTEES (CDAC)

RULES AND REGULATIONS FOR ETHNIC CHIN IN CHERAS

MALAYSIA

Goal: “In order to our safety, we should obey the following”.

CODE (1) Don’t get drunk, don’t make any quarrel and annoyance in Cheras.

Those who do not obey Code (1) would meet, five times flogging punishment.
Those who break Code (1) for the second time would meet, five times flogging punishment. Besides, he would be fined RM50.
Those who break Code (1) for the third time would be submitted to IMBI CDAC with his UNHCR Card/ document.

CODE (2) It is forbidden to drink outdoor.

Those who do not obey Code (2) would be fined RM50.

CODE (3) Women should not go out wearing Myanmar blouse, and men with vest.

Those who break Code (3) would be made known to public through pamphlet.

CODE (4) Every member of CDAC should be given respect as CDAC is voluntary
activity/job.

If someone breaks sacrilege to CDAC,CDAC would give him compatible punishment.

CODE (5) A drunk person should not bring arms or harmful materials.

Those who break Code (5) would meet compatible punishment by CDAC.

Note: Every Chin in Cheras Alam Jaya should obey the above mentioned rules. Anyone
who breaks the rules would meet punishment according to relevant Codes.

Chairman : Mr.Ni To 016-3365398 Saikah
Vice-Chairman : Mr.Ral Lian Bawi 016-2345212 Thau Fellowship
Secretary : Mr.Bawi Lian Mang 016-2709306 Hakha Fellowship
Asst. Secretary : Mr.Bawi Lian 010-2906031 CCF. Cheras
Treasurer : Mr. Ngun Ceu 017-3815192 Hakha Fellowship
Asst. Treasurer : Mr Biak Sang 016-2560194 CCF .Cheras

CHIN DISCIPLINARY ACTION COMMITTEE (CHERAS)

“Discipline is human value”

Cheras CDAC Authawng( NO.3)

2009-10-16T21:37:00.000-07:00

Editorial,
Ai thleng lengmangmi khuacaan,thil sining,chan tiluan chungah khua asa ve mi lai miphun kan si.Khua caan ai thleng lengmang nain ai thleng kho bal lomi ralkap uknak nih nihin nitiang har ngai in khua a kan sak ter.Kan ram te ah humhim tein um kan duh cio hna nain nihin ni ahcun kan duh ning bang si loin kan ram kan vawlei zong asi lomi Malaysia ram ah khua kan sa hna.Pathian attha Lai miphun caah,zei thil ti khawhnak kan ngeih lo buin a kan cawisan.Kan pumpaw cawmnak ah tlamtlin nak a kan pek.Ei lo ding loin kan um hraw rih lo.Pathian cu ai tumcawp mi asi bang ,zei thil kan tonmi kip ah lungretheihnak si loin lunglomhnak in a cohlan tu si hna usih.Kan lungretheihnak nih kan pum chung ah harnak a chuahpi khawh caah kan tonmi kip ah lungsi tein um i zuam kan hau.
Kan ram cu kir hnawh a phut rih lai lo caah Laimi tampi cu ramthumnak lei i ruahchan kan hau ko.Kan kal hlan ah zei tinhmi he dah kan kal lai.A tawinak in ka vun langhter:

1.Khirhfa kan si bantuk in Pathian i bochan hna usih.
2.Kan sifah,kan harsat ruang ah ramleng a chuakmi kan si bantuk in sifah nak in zeitindah kan luat khawh lai ti lam kawl usih.Miteima si kan hau.
3.Khoika ram kan phak hmanh ah kan nunphung,kan holh hi dirkamh hna usih.
4.Fim cawnnak ah thazaang a chuahmi le fimnak a biapit zia a theimi si hna usih.Upa deuh fimnak a cawng kho ti lo kan si hmanh ah kan fa le fimcawnnak ah tha pe hna usih.Fa le caah tinhpiakmi ngei usih.Vawlei huap in rian a ttuan kho an sinak hnga nu le pa nih ttanpi an hau.Thlacamnak in forhfialnak in etc..
5.Phaknak ram ah pem thai ai timmi si loin kan lairam ah nikhatkhat cu ka kir te ko lai timi ruahnak ngei usih.
6.Kan phaknak hmun,zei miphun hmai hmanh ah lungput ttha ngei zungzal usih.Kan lungput cu kan lam asi bang kan lungput atthat ahcun kan thil tuahmi ah kan tluang ko lai.Mathai 5:8 chung “ Lungthin a thiangmi cu lunglawmmi nan va si dah! Pathian kha nan hmuh lai.”

Phungtluk

“Tlawmte lawng bia chim,nain biadawh te tu chim. ( Iris Phungtluk)
Lei hi ruh a ngei lo nain mithahnak hmual angei.Biachim holh rel ralrin ahau tinak.(Phungtluk)
Mirum cu rumnak thilri i a sal asi.(Tamil Phungtluk)

UNHCR ti cu zeidah asi?
UNHCR timi cu ralzam hna kha vawleicung ramkip ah huhphen hna ding caah 1951 kum ah an rak thawk mi UN tangah a ummi ralzam hna caah rianttuannak zung pakhat asi.

UNHCR nih a ngeihmi policy pathum
UNHCR cu ralzam hna caah attha bik in rianttuantu, ralzam bawmtu an si.UNHCR policy hna cu atanglei bantuk in an si.

1. Mah duh tein mah te ram/ khua ah kuat tthannak:
Kan ram hna Democracy ram ah i thleng sual seh law UNHCR nih kan ram ah a kan kuat tthan lai tinak asi.

2. Ralzam i dornak ram ah tlamtling tein um khawh nak:
Ralzam humhimnak caah nai dornak ram ah mah le mah i zohkhenh khawhnak,cawlcangh khawhnak le zalong tein umkhawhnak nawl pek na si lai tinak asi.Malaysia cozah cu ralzam a pom lo mi ram asi caah nihin ni tiang tleih le khih kan ton pengnak asi.Nain ralzam caah caan tawi te chung an ram kan i dor khawhnak hnga tiah UNHCR Malaysia cozah sin ah lam an kawl cuahmah lio asi.

3. A humhim mi aramthumnak (third country) i kuat nak:
Hi a sullam cu nangmah cu phung le phai ning tein a ramthumnak ah kuat khawh na si.Ramthumnak kan ti tik ah ralzam a cheukhat lawng nih an hmuh khawhmi asi.A ruang cu a ramthumnak pawl nih an lak ding a zat in ri an khiah cio caah asi.

UNHCR nih ralzam caah a tuahmi rian hna cu:
Ralzam tiah pom na si tik ah ralzam sinak Card chuahpiak.
UN Card angei cangmi, dam loin siizung na phak sual ahcun na dih mi phaisa acheu bomh ding.
Tleih khih na ton tik ah bomh chanh ding.

Note:Police nih an in tleih sual asi ahcun UN Card hnu lei ph.number ah thawngthanh colh ding asi lai.

PHILH LO DING :
Ralzam asi mi paoh nih ramthumnak ah na kal lai tinak asi lo.Na ralzam sinak sining zoh in a ramthumnak lei ah kal nak tuah piak a si.Kawlram na um lio na sining le kawlram in na rak zamnak a ruang na chungkhar kong,na harnak vial te tlamtling tein UNHCR rianttuan tu sin ah na chim khawh ahau.UNHCR zung luhkhawhnak ah tangka zeihmanh ahau lo tangka an halmi an um sual asi ahcun UNHCR zung ah report tuah khawh asi.UNHCR nih a tuahpiakmi rian vialte cu aman pek ahau lo, alak in asi.
“ Zung alut rih lomi nih lungsau tein kan min pek nak cio in kan hngahnak lai.”

Zarhhnih chung CDAC rianttuannak (Dantatmi)

1.A luancia thlakhat hrawng i buaibainak arak tuahtu Zephai khuami Victor Ce Lai cu (4.10.2009)ni ah CDAC phung ning in dantatnak le chimhhrinnak ngeih asi .

2.Block C hleihlak i a zun arak zungmi Hakha Aung Turah cu (4/10/09) ah CDAC phung ning in dantatnak le chimhhrinnak ngeih asi.

Thawngthanh

13.10.2009 zan 11:40pm ah Lungding khuami Van Lin Thang cu buaibai in aum caah Tlangpi khuami minung pathum nih heh!!! tiah an rak tleih len.CDAC sin ah thawng an thanh i an va chuah hnawh hna.Zu arak rit tuk cang caah zei bia achim hmanh ai thei lo.Van Lin Thang cu kan hnu i nam hma a pu cangmi kha asi.A chimmi tampi lak ah pakhat “nai i nam a ka hliammi cung ah kai lungsak lo” tiah a ti.CDAC nih an inn tiang an va thlah.I sik nak cu an chuahpi lo nain hi hnu ah zantlai hnu ah hi ti um ti lo dingin Tlangpi khuami minung pathum le tiin CDAC upa,CCF khrihfa upa hna hmai ah biakamnak an ngeih ter hna.

Van Lin Thang hi Cheras sang chungah a voi hnihnak buaibainak a chuahpi cang caah CDAC phung ning in dantatnak chap chih asi.Hlan i arak buarmi phung ruangah fung(5),a voihnihnak zohchia buaibai in aum tthan caah phung ning in fung 5 le RM50 dantat ding..A za te fungtuk voi 10 le RM 50 dantat ding asi.A mah hi a rauh hlan ah ramthumnak a zuang ding asi cang caah CDAC nih a rannak in dantatnak ngeih ding an i tim.

CDAC nih zulh ding phungphai an suaimi (a buar mi paoh)phung ning in zeibantuk an si hmanh ah dantatnak inn ter an si.Hmun dang in Cheras ah nan inn ah an in riak sual hna asi ahcun innngeitu nih zulh ding phung nan rel piak nak hna lai kan in theihter hna….

CDAC Zulh ding phung Code(3)
“Khualak ah nu nih hnifenh buin leng chuah lo ding.”Pa nih liangbah angki he leng chuah lo ding. A zul lomi nan min,nan khua he thawngzamhnak ca ah chuah ding ti asi.

CODE (3) a buarmi kan theih tawk( Hnifenh buin leng a chuakmi)

Zephai khuami Sa Chin Sung
Tlangrua khuami Hoi Tang
Thau khuami Zing Khun (Zing-zee)ah

Nu nih leng kan chuah tik ah hni he hna leng kan chuahmi cu zoh a rak rem lo ngai.Laimi kan ca ahcun zohrem a rak si kho men nain miphun dang hna zohnak ah zoh arak chiat ngai caah asi.Thil hrukaih zong hi kan thiam ngaingai a hau.Pawngkam miphun dang an mit kan kemnak hnga lo hrukaih zongah ralrin deuh kan hau..

Minremh tthannak
Theing Aung Myint(Ceu Kung) tiin kan rak tial mi kha Theing Aung Myint nih UN zung luhnak ah Ceu Kung min in arak luh caah asi. Sopum khuami Teing Aung Myint tu kha a buaibai mi cu asi.

A hmunmi rian hmuh khawh i zuam kan hau
Nai hrawng i UN lut tharmi hna caah cun ramthumnak kalnak hi a rauh deuh rih lai caah UN Card ai tleih cangmi nih rianttha kawl kan hau cang.Nihlawh kongah buai tuk loin caan saupi ttuan khawh ding mi rian tu kha i thim kan hau cang.Zei can tiang Malaysia ah khua kan sak lai theih asi lo caah..

Rian loin aum mi hna caah thawngttha !!!
Electronic sehzung ah minung an duh,minung tamngai an duh caah rian loin a ummi nu /pa ttuan khawh asi.Selongor chung ah asi lai i ariak in si lai.Umnak inn pek ei tu cu mah tein i chuankhin ding.Zing 8:00 in zan 8:00 tiang.Nikhat ah RM 30.Zarhpi ni off day asi nain ttuan a duhmi caah ttuankhawh asi tthiamthiam.Zarhpi ni cu holiday asi caah nihlawh a let in pek asi lai.Sehzung asi caah tleih le khih aum lai lo.UN card ai tleihmi lawng a ngah lai.Min le UN number pek hnu in rianttuannak card ser piak asi lai. A rannak in na min na rak pek nak lai thawng kan in thanh.Min pek nak-Upa Ngun Ceu. Phone…017-3815192 sin ah hlat khawh asi….

LUNGLOMHNAK
Cheras CDAC zulh ding phungphai le contact numbers pawl nan inn cio kan rak tarmi kha Van Hmun Uk nih a lak in catlap he cattail nak computer he a kan hlut caah a cung ah lawmnak tampi kan ngei.

Nu le Pa kan rian:
Kan fa le sianginn an lawi hnu ah zeidah an tuah ti hi nu le pa hna nih ttha tein kan zohkhenh hna an hau.A cheu kan fa le cu mi dum theihai hna nawl ngei loin va lawh an hmang.Leng ah kan chuah ter tuk hna.Khuasual hna an purhnak hnga lo nu le pa kan rian asi.

**Zu rit buaibai in a ummi nan hmuh hna ahcun CDAC sin ah thawng nan rak thanh colhnak lai kan in sawm hna.

v Cheras CDAC Authawng ah na siaherh article tial na duh ahcun ttial khawh asi.Zarhhnih ah voikhat chuah asi.

Cheras CDAC Authawng Tawl reltu
Salai Biak Hmun Lian
Upa Van Hmun Uk

Webside : http://www.batu9cdac.blogspot.com/ ah zoh khawh asi .

“Discipline is human value”

CHERAS CDAC AUTHAWNG (No.2)

2009-10-03T02:48:00.000-07:00

　CHERAS CDAC AUTHAWNG

Timhmi: Cheras sang chung um Lai miphun nih him tein kan um khawhnak hnga:

4 October,2009 ( Avoihnihnak)

CDAC Aan,
Vawlei nih akal pi ve lengmang mi atulio laimi ramthumnak kal thlihran nih ahung phak nak kum 4-5 chung ah kan lut cang. Laimi nih ramthumnak kan kal mi hi Pathian thlawchuah na ti maw?..Asiloah, nangmah fimthiamnak in maw asi?... lole, kan ram tthatlo ruang ah dah asi? …timi biahal nak hi pumpak cio ah hal sisehlaw, kei ka ruahnak ahcun, zaapi nih nan chim ding kan chim cio ding ah ka ruah ve mi cu Pathian thlawchuah asi kan ti cio men lai..Kan upa le pawl nih hmai ah kal in lam akan sial piak i, an mah hna thawng in, nihin ni tiang ah ramthum nak akal cangmi laimi hi kan tamtuk lo zong ah kan tlawmtuk tilo..Hi a ramthumnak kal hi, kan lai mi nih Pathian thlawchuah kan ti asi ahcun, ziahhme! Pathian nih thlawchuah apek mi hna cu an mah le an ram te ah khurkhua an huah i, an um ding khi asi ko lo maw? An ram te ah dum le lo hna ituah i ei cawk lo ti le rawl in akhah ding khi asi ko lo maw? An ram te ah an Pathian zong kha thatein an thangthat ding khi asi ko lo maw? Miram dang ah kal in hnangam nak va kawl cu asi kho hnga hme maw, timi zong hi ruah ngaingai ahau. Kei ka hmuh ve nak ah cun, atulio laimi hi Pathian nih thlawchuah an kan pek siloin, dantatnak chung ah kan um lio asi ti in, ka ruah. Hmailei kan lungfim nak asilo sual ahcun, kan khua kan ram chimlo, kan miphun ning in kan lotlau lai, ti zong kan upa mifim deuh poah nih cun ca zong in, hmurka zong in an au pi len cang.. Culak ah, nang le kei nih lungfim huaha lo in, nichiar zu din le phe kah, chimh ngaih lo, mah nak upa hna zeirel lo, kai lawm tihmanh chim thiam lo le Malaysia hna ah mah khua tlawn in tlawn, aukhuan salam ah apoilo ti pawl hi.zeihme kan ruah..atulio harsatnak, dantat nak kan inn lio ah hin hmailei kan caah, thancho nak lei tu apanhmi si u sih law, kan miphun le kan lai ram tlau lo ding in akilveng tu si hi i zuam ah atha hnga lo maw? Micung ah thatnak kan tuah khawhlo hmanh ah, achiatnak chuahtu hi cu si hlah usih law, kan ining saomo ko lai. Achim tu sinak in atuah tu si hi ahohmanh nih si izuam ding hi kan sawm hna…
Thawngthanh
20.9.2009 Zarhpini zan 11pm ah Ruakhua khuami Tial Za Thang (Kum 32) cu aumnak Miharja in Cheras ah a rak ra i,Ruabuk khua inn a ummi Henry Siang Lian he buaibainak an chuahpi caah CDAC nih phungning tein chimhrinnak le dantatnak an ngeih hna.

25.9.2009 Ninga ni zan 8pm hrawng ah Thau khuami Van Nun Tha cu Ni Lian Thawng (Thau Khuami)aumnak innka hrengtlung in ava ceh ruang ah innpa Kala le Tuluk Rela pa nih an rak chuah hnawh hna i,fak ngai in an rak vuak.CDAC ah thawng an thanh i, kan va nawl piak.Inn ah kan lawi pi.9:30 pm hrawng ah ava fuh tthan hna i,Ni Lian Thawng te innka cu zu palang in a den tthan.CDAC upa nih phung ning in dantatnak le chimhrinnak an ngeih hna.

27.09.2009 Zarhpini zan 8:30pm hrawng ah Hakha Aung Turah nih Block C hleihlak ah zohchia ngai in a zun azun.CDAC upa nih chimhhrin ding ah an va kal hnawh i arak zam ca’h a kong ceih tthan ding in CDAC upa hna nih timhtuahnak an ngei.

29.09.2009 Nihnih ni chun laipi ah Tlangpi khuami Uk Cung(kum 22) cu Alam jaya Bus Stop ah zohchia ngai in zu a din caah Malay Police pa nih a bengh,a kutkhat in a cawi i,cabuai ah a hlawnh hnu ah CDAC upa le Tlangpi khua upa nih an chimhhrin i,CDAC upa pakhat nih an inn hlei tiang ava tlah.Cu hnu tlawmpal ah arak kir tthan i,tuan i adin mi bantuk zu ai cawk i adin tthan. Malaysia Taxi mawngpa zong hnahnawhnak apek i Taxi mawngpa nih voihnih a bengh.Cu hnu ah lamkam thingkung hram ah a zun a zun rih.Mi mit akem tuk cang ruang ah Malay Police pa tthiamthiam nih fak ngai in a vuak tthan hnu ah ti zong a tawih chih rih.Cu hnu ah CDAC upa nih an inn ah an va chiah tthan.Mah ni lila ahcun phungning tein CDAC nih dantatnak le chimhhrinnak an ngeih.

27.09.2009 Zarhpi zing dei hlan 3-4 kar ah Tlangpi khuami Van Bawi Cuan (kum28) nih lungding khuami Van Lin Thang cu Cheras certual ah an i si,Van Bawi Cuan nih a hnu lei ttawk ah nam in a sawh ca’h UKM siizung ah an kal pi.
26.09.2009 Zarhte zan i Van Nun Tha (Thau) le Ni Lian Thawng an rak buai ruang, Van Nun Tha nih inn-kaa hreitlung in a ceh ruang ah inn pa Tuluk,India nih Oparasi alut lai tiah an tthith pheih hna i laimi tampi cu thinphang in an um. 27.9.2009 zarhpi zan cu nu le hngakchia tiin certual ahcun thinphang ngai in an zam hna.An zamnak hmun ahcun tlangval cheukhat nih zu an ken i an ding pah hna.Van Lin Thang nih Tlangpi khuami Val Thang Thaisong dur hnih aken piak i, tlai hnu ah mah dur hnih lawng cu a tan cang caah Van Bawi Cuan nih Van Lin Thang cu zu durkhat in ka pe ve tiah ahal..Van Lin Thang nih" ka siang loh’’nangmah tein na duh ahcun dawr ah vai cawk ve ko.Keimah zu zong asi loh,Val Thang zu asi tiah ati.Val Thang nih cun Van Bawi Cuan hi tangka a bat caah Van Lin zong kha zu ahal nak asi tiah anti..Mah tlawmpal cun Van Bawi Cuan le Van Lin Thang cu an i si colh.Van Lin Thang nih a ttang ah alamh i,cu hnu ah nam te sawhnak tiang an can cu asi.4:45Am ah CDAC upa pawl cu an va phan i UKM siizung ah Taxi in Van Lin Thang cu an kal pi colh.Tlangpi le Lungding khua hnih zong i remnak an ngeih caah CDAC nih an ngeihmi phunglam ning in dantatnak le chimhhrinnak an ngeihmi cu a tanglei bantuk in asi..

** Van Bawi Cuan(Tlangpi)cu IMBI CDAC ah thlakhat thong, RM500 le fungtuk voi 10 innter ding.
** Van Lin Thang (Lungding)-Fungtuk voi 5 innter ding.

2.10.2009 Ninga zan 8:30,Sopum khuami Theing Aung Myint(Ceu Kung)Kum20 cu aluancia thlakhat hrawng ah India nih a kut nam in an rak tuk mi kha asi.A kut cu dam lei apanh cang i,a umnak Puchong in Cheras ah arak kai.India pawl lehrulcham duh ah ka ra tiah amah nih cun achim.Zu ari i,Cheras sang chung Block C ah buaibainak le CDAC upa hna chimmi zei rel loin aum caah CDAC phungning in dantatnak le chimhhrinnak an ngeih hnu ah Puchong ah an khuami nih an tlah..

12.9.2009 arak buaimi DavidThang(Zephai) le Biak Lian(Thau) cu CDAC phungning in dantatnak le chimhhrinnak an ngeih cang hna.Nain Victor Ce Lai tucu CDAC upa nih aumnak inn ah voihnih tiang an kal hnawh nain a um bal lo caah chimhrinnak le dantatnak an ngei kho rih lo.

CDAC rianttuannak hi pumpek rian asi caah mipi nih dir kamh kan hau.Himnak kan hmuh khawhnak hnga zang hlei cawi cio kan herh…..

CHERAS CDAC AUTHAWNG

2009-10-03T02:40:00.000-07:00

CHERAS CDAC AUTHAWNG ( No.1 September20 )

Tinhmi: Cheras sang chung um Lai miphun nih him tein kan um khawhnak hnga:

Biahram thawk

**Tulio kan thawngpang le kan thlihran zoh tik ah tuk asum ko. Khatlei ah thawngpangchia ee,oparasi an lut ee, khakha an tleih ee, kala pawl nih an vuak hna ee, damiah an tteih hna ee, tibantuk thawng kan theihtik ah thinlung cu adai kho hrimlo.Rian tthatthi tlai zong hi kan um tuk lo. Innkhat ah minung (10) kan um ahcun pa 1 hrawng lawng rian ngei kan si. Kan hmuhmi le kan ei mi ai keih lo.Culailakah, lai lei in ara mi le kan tam chin rih. A minung kan tammi kha cu attha ngaiko .. sihmanhsehlaw, kan karh tluk in zu din le sikvuak hi cu karh hlah seh law attha kan ti lio ah, kaa khat lei ah an isi ti le kaa khat lei ah an ivua tibantuk, asi tik ah, oparasi luh lai zong kan phang ngai ko.
**Keimah pakhat sual le palh ruang ah kan lai mi vialte nih kan intuar dingmi hi ruah tik ah tuk asum hringhran…Pathian nih akan dawt tuk tipin in chimding dang zong aum ti lo. CDAC chungttuan pawl hna nih pumpek in acunglei acang mi thil pawl hna hi asikhawh chung in khamkhawh kan izuam tik ah pumpek rian asitik ah mipi zong nih kan theihthiam piak ve uh law mipi pumpak cio nih kan dirpi ve uh, CDAC riantuan nak hi mipi nih kan dirkamh uh…tiin kan in sawm hna..

CDAC zulhding phunglam le Hruatu contact number kan rak in phawt tik hna ah nan inn cio ah nan rak tarnak lai kan in theihter hna.

CDAC Authawng cu zarhtin tein chuah khawh kan i zuam peng lai.

Him tein kan um khawh peng nak lai thlacam cio hna usih.

Thawngthanh
*5.09.2009 Zarhpi zan ah Bungtlang khuami Hum Tu Bawi (kum18) cu zu a rit ruang ah amit tlang ai khawn i a tlek.Clinic ah an tthit A ho he an i sik theih asi lo.Amah nih cun Kala nih anka vuak tiah ati.Zu din tik ah mah hngal lo tiang in din hi cu apoi ngaingai.Upa nih chimhhrinna an ngeih.

*12.09.2009 Zarhpi ni ah Zephai khuami David Thang (kum 16),Victor Ce Lai (kum15) le Aibur khuami Robert cu kawldawr zu an dinnak ah an buai i CDAC upa nih an va kal hnawh colh hna.Aibur khuami Robert cu dai tein inn ah an lawi pi khawh Upa nih chimh hrinnak zong an ngeih.Hi hnu ka buai ti lai lo ti zong amah pumpak nih ati..Zephai khuami David le Victor tu cu ninghngal ngai in an um peng caah CDAC Upa pakhat nih David cu voikhat a bengh..A bengh le cangka in an pahnih in nam an i chuah i,kan neih hlah uh tiah CDAC upa pawl cu an dirh onh hna.Cu ti cun zoh sawh an si i,ahnu ah kawlpa ara i a lawipi khawh hna.Mah zan lila cu an buai hoi.Reoport aum caah mipi thinphang in um asi..Mah zan lila ah CDAC Upa cu Duty ciah ding in Kala dawr ah an tthu.Ruah lo pi ah Zephai khuami pathum an hung i zul i pakhat cu kan tthutnak cabuai lei ahcun arak ra.Pu Ni To cu ka u biahal kan duh tiah avun ti colh.Zei bia avun ti ah,mipa nih cun’’tu ni ah ka nau pa na bengh rua’’ tiah.Pu To nih ka bengh ko,Ziah avun ti.A palh maw?tiah avun ti nolh.Pu To cu a thinhan tuk ah a holh kho lo.Hibantuk lungput ttha lo ngeih hi mibu i hruainak ah donkhan tu asi.CDAC zong ah an i tel duh lo caah ruah awk ngai aum.
Lungput Ttha Ngei Hna Usih

**** Khua pakhat ah thil ti kho ngai, sa zong a kap ngaimi pakhat aum.Asinain a lungput attha lo i khuami he an i rem lo. Voikhat cu ngalhriang sum sarih a kah I apum ningin inn ah an tlunpi.Mi lungput tthalo a si caah innpa hmanh nih a sakahmi an zohpiak lo.Za tlak sa bang tual ah an thlai ko ti asi.A poi hringhran.

*** Minung hi kan si khawhnak in zoh asi lo.Kan sinak tu in zoh deuh asi.Kan sinak hi nifatin kannunnak ah a langtawn,zawnruahnak,toidornak le athiangmi kan lungput hna an si.Si khawhnak angei mi cheukhat cu nahchuah an hmang,ziar an ngei,an ding lo,mah ca deuh ah an nung,midang tthatnak an hmu kho lo.A cheu cu thil an ti kho ngai,an rum nain mi nih an zenh hna i a leng kapehle in fak an tong nain mipi lungthin ah ram an ngei lo i ram le miphun nih an bochan bal hna lo.

*** India hruaitu Gandhi hi alungput tthatmi nih India ram a ser an ti.A thih tikah angeihmi phanat le mitbenh le adang thil tlawmte lawng a roh. Asinain Gandhi cu arum ko zeicatiah ‘’India rampi pei angeih cu’’ an ti.India mipi thinlung ah ram kaupi angei tinak asi.Lungput tthat hi zuamnak,teimaknak te hna nih azulh tik ah mipi zatlang nun kha asersiam khawh.
*** Jesuh lungput kan zoh tikah Pathian sinak a ngei nain sal sinak tu kha aa thim i toidornak lungthin in vailam cung thihnak tiang a in……( Fil. 2:5-7 ).Jesuh cu miding,mitoidor,midang zawn aruatmi, mittuan ,miteima, milungthiang le mithinsau asi.A nah a chuak lo, ziar a ngei lo,midang tthatnak tuah a duh zungzal.... Hi lungput ttha hi a nunnak in a kan cawn piak.(Rev.Dr.Sang Awr,Lungput (Joel ling) Biahmaitthi tial mi chung in)

*** Lungput tthat hi kan miphun nih kan herh tuk hringhran.Nang le kei zei lungput he dah hi vawlei kan caan kan liamter ve.Mah zawn ruahnak in maw, asi lo ah uah ngai le lungpuam ngai in dah.Kan miphun a kan niam ter tu le zoh dawh loin a kan umter tu lungput hi remh cang hna usih tiin...

Zei Lungput Dah Kan Ngeih

Tu lio Malaysia ummi minung hi kan lungput a rawhzia cu chim hau lo asi.A hlei in mino kan lungput a rawh ning ko hi a zualhma.
A luancia kum 110 hrawng ahcun lai miphun hi khuakhat le khuakhat rak i doh,rak i that arak si.Mithah hmanh thangthatnak ah arak hmangmi miphun kan rak si. Nihin ahcun mah bantuk cu aum ti lo,nain nang ‘’Zo ee’’ kei ‘’Lai ee’’ pakhat le pakhat entainak lungput hi kan zatlang nun ah aum pah rih.A bi tuk mi ruahnak hi tlau kan hau cang. Lai ah pumkhat, sining tling he kan miphun tthanchonak caah thazangchuah hna usih.Kan lungput a tthat lo ahcun zeitik hmanh ah hawi sin ah kan i pawlkom kho lai lo.Ralzam asi mi nang le kei nih zei lungput he dah Malay ram ah kan nun lai ti hi ruah lo awk attha lo.Lai miphun thinlung ah kan dam khawhnak hnga, kan him nak caah dirhmi CDAC hi zei rel loin um loin thazang chuah cio hna usih.Khat le khat i entainak um loin lungrual tein thangzang chuah cio hna usih.Keimah ti lungput le i uahnak lungput hi thlau cang hna usih…

Ralzam asi mi nih ralzam kan sinak i thei buin nun khawh i zuam usih.Miphun dang mit kan kemnak hnga lo.

Kan tha thu hlah usih.

UN Card kan i tleihmi hi,phawr hlawtnak ah hmang hlah usih

Leng kan chuah tik ah ral ring deuh tein le mit zoh pang tein kal um thiam i zuam usih.nai hrawng cu CID tlaih atam caah.
　
　
　
　
　
　
　
　
　
　
　
　
　
　